७ गते फिब्व ख्यलय् ज्याझ्वः याके मबीगु

येँ (नेपालभाषा टाइम्स)- थ्वहे वइगु मंसिर २ गते एमाले समर्थित युवा संघ व जुजुवादी नेता दुर्गा प्रसाईं येँया फिब्व ख्यलय् याये धयातःगु ज्याझ्वः येँया सिडिओपाखें याके मबीगु जूगु दु । निगुलिं पक्षं फिब्व ख्यलय् प्रदर्शन यायेत सिडियो कार्यालयय् अनुमति फ्वंगु खःसा सिडियों निगुलिं पुचःयात अन ज्याझ्वः याके मबीगु निर्णय याःगु खः ।

येँया सहायक सिडियो लिसें प्रवक्ता रविन्द्रप्रसाद आचार्यं फिब्व ख्यलय् गुगुं नं कथंया ज्याझ्वः मयाकेगु खँ धासें उकिया नितिं माःगु सुरक्षा व्यवस्था यायेगु जानकारी नेपालभाषा टाइम्सयात बियादिल ।

वय्कलं निगुलिं पक्षलिसे थःपिनि सम्पर्क दुगु खँ कँसें संविधान व कानुन पालना यानाः मेगु हे अलग अलग थासय् ज्याझ्वः याः हुँ धकाः थःपिसं धायेधुनागु खँ कँसें धयादिल, ‘फिब्व ख्यः लाइफ लाइन खः । थन आपालं सवारी साधन जक मखु दमकल व एम्बुलेन्स नं वये वने यानाच्वनी । अथे जुयाः अन ज्याझ्वः याकेगु खँ जुइ मखु ।’

वकुन्हु सिडियो कार्यालयं फिब्व ख्यलय् निषेधाज्ञा जारी याये फइगु खँ नं वय्कलं कनादिल । सुना नं जबर्जस्ती ज्याझ्वः मयायेमा धकाः अन निषेधाज्ञा जारी यायेगु तयारी जुयाच्वंगु खँ वय्कलं कनादिल । सुनां गन ज्याझ्वः याइ धइगु औपचारिक निर्णय मजूनि धासें वय्कलं निगुलिं पुचलं बिस्कं बिस्कं रुट दयेकाः ज्याझ्वः यात धाःसा थःपिंत आपत्ति मदुगु तर उकिया जानकारी धाःसा जिल्ला प्रशासन कार्यालययात बीमाःगु खँ नं कनादिल ।