लँजुवाःतय्त लँ त्वाःल्हायेगु प्रशिक्षण

येँ- ट्राफिक प्रहरीं लाक्वपाक्व व सवारी नियम हाचां गायाः सवारी साधन चले याइपिंत कारवाही ला याना वयाच्वंगु हे जुल । आः न्ह्यःने लाःगु थासं लँ त्वाः ल्हाइपिंत प्रशिक्षण बीगु जूगु दु ।

स्वनिगलय् लाक्वपाक्व थासं वा सतक त्वाः ल्हाइपिं लँजुवाःतय्त ट्राफिक प्रहरीं नियन्त्रणय् कयाः सतकय् हे प्रशिक्षण बीगु जूगु दु ।
स्वनिगलय् न्ह्यःने लाःथासं सतक त्वाः ल्हाइगु कारणं सतक दुर्घटना अप्वःगु धासें महानगरीय ट्राफिक प्रहरी महाशाखां लाक्वपाक्व थासं लँ त्वाः ल्हाइपिं यात्रुतय्त आवंलि सतकय् हे तयाः निघौतक प्रशिक्षण बीगु जूगु दु ।

महाशाखा प्रमुख लिसें प्रहरी वरिष्ठ उपरीक्षक वसन्तकुमार पन्तं लुँजुवाःतय्त आकाशे पुल वा जेब्रा क्रसिङपाखें जक लँ त्वाः ल्हायेगु बानी याकेगु निंतिं स्वनिगःया थीथी झिंनिगू थासय् उकथंया प्रशिक्षण ज्याझ्वः संचालन यानागु जानकारी बियादीगु दु । वय्कलं धयादिल, ‘प्रशिक्षण सतक सभ्यताया विकास जुइ जक मखसे लाक्वपाक्व थासं लँ त्वाः ल्हाइगु कारणं जुइगु सतक दुर्घटनाय् नं थुकिं म्होति हयेत ग्वाहालि याइ ।’

महाशाखाया कथं कोटेश्वर, न्हू बानेश्वर थिमि, पुलांगु बसपार्क, केशरमहल, सिंहदरवार, गौशाला, त्रिपुरेश्वर, थापाथली, महाराजगंज, कालिमाति व जावलाख्यय् लँजुवाःतय्त प्रशिक्षण बीत छम्ह प्रहरी निरीक्षकया नेतृत्वय् छम्ह प्रहरी जवान खटे याःगु दु ।