एमसिसीया निर्णय नेकपा सचिवालयं याइगु
येँ – सत्तारुढ दल नेकपाया प्रवक्ता नारायणकाजी श्रेष्ठं अमेरिकी सहयोग प्रस्ताव मिलेनियमि च्यालेन्ज कर्पोरेशन (एमसिसी)या बारे पार्टीं याकनं हे निर्णय याइगु खँ धयादीगु दु । बेनीइ जूगु छगू पत्रकार सम्मेलनय् न्ववानादिसें वय्कलं पार्टीया सचिवालय बैठकं राष्ट्रिय स्वाधीनता व विकासयात ध्यानय् तयाः निर्णय जुइगु दावी यानादीगु खः । वय्कलं धयादीगु दु, ‘आः थ्व प्रस्तावयात कयाः ताःई तक पियाच्वनेगु अवस्था मदु । पार्टीया सचिवालय बैठकयात निर्णय यायेगु निर्देशन जूगु दु । आः च्वनीगु बैठकं थुकिया बारे निर्णय याइगु जुइ ।’
थ्व अमेरिकी अनुदानयात कयाः सत्तारुढ दल नेकपा दुने हे तच्वःगु विवाद जुयाच्वंगु दु । पुलांम्ह गृहमन्त्री भीम रावल थेंज्याःपिं शक्तिशाली नेतातय्सं हे थ्व अनुदान स्वीकार यायेमजिउगु धासें विरोध प्वंकाच्वंगु दु । रावलपिंसं थ्व अनुदानया नामय् अमेरिकां
नेपालय् सैन्य क्याम्प खडा यायेफुगु चिन्ता प्वंका वयाच्वंगु दु । नेकपाय् एमएमसी परियोजना अमेरिकाया इन्डो प्यासेफिकया हे छगू अंग खः धासें विरोध जुया वयाच्वंगु खः ।
थ्वहे दथुइ राष्ट्रिय प्रजातन्त्र पार्टी नेपालया अध्यक्ष कमल थापां एमसीसी अनुदानयात स्वीकार यायेमाःगु खँ धयादीगु दु । वय्कलं म्हिगः छगू ज्याझ्वलय् न्ववानादिसें एमएमसी परियोजना नेपाःया हीतय् दुगु दावी यानादीगु खः । राप्रपाया अध्यक्ष थापां बागमति प्रदेशस्तरीय श्रम भेलाया उलेज्या यासें एमसीसी सम्झौता सदनं पास जुल धाःसा नेपालय् छुं नं कथंया सैन्य गतिविधि मजुइगु दावी यासें एमएमसीं सम्झौता जुल धाःसा नेपालय् अमेरिकी सेना दुहां वयेफइ धयागु धापू अपरिपक्व खः धयादीगु खः ।
थ्वहे दथुइ नेपाःस्थित अमेरिकी दूतावासं शुक्रवाः छगू विज्ञप्ति जारी यासें एमएमसी अमेरिकाया छुं नं कथंया सैन्य ज्याझ्वःलिसे सरोकार मदु धासें स्पष्टीकरण बिउगु दु । एमसिसी सम्बन्धय् झिगू महत्वपूर्ण बुँदा दुथ्याकाः पितबिउगु विज्ञप्तिइ अमेरिकी कानुनं हे एमसिसी परियोजनाय् सैन्य संलग्नतायात निषेध यानातःगु खँ न्ह्यथनातःगु दु । विज्ञप्तिइ एमसिसी परियोजना विशुद्ध रुपं आर्थिक विकासय् केन्द्रीत दुगु व विद्युतीय लाइन निर्माण व सतक स्तरोन्नति पाखें आर्थिक विकासय् ग्वाहालि यायेगु परियोजना जक जूगु खँ धयातःगु दु । झिगू बुँदाय् एमसिसी दुथ्याइगु परियोजना नेपालं हे ल्यइगु खँ नं धयातःगु दु ।
LEAVE YOUR COMMENTS