ने. सं. ११४४ कौलाथ्व सप्तमी - फूलपाती

मेलम्ची तत्काल वइगु सम्भावना मदु

येँ (नेपालभाषा टाइम्स) – स्वनिगलय् त्वनेगु लःया समस्या समाधानया निंतिं छगू जक विकल्पया रुपय् न्ह्यःने वयाच्वंगु मेलम्चीया लः स्वनिगलय् हयेत अझं ई काइगु जूगु दु। राष्ट्रिय गौरवया प्राथमिकताय् लानाच्वंगु व बहुचर्चित नापं बहुप्रतिक्षित मेलम्ची खानेपानी आयोजनाया लः स्वनिगलय् स्वला लिपा जक वइगु सम्भावना खने दयाच्वंगु दु ।

आयोजनाया सुरुबय् च्वंगु गेटया फ्रेम हिलेमाःगु व उकिया निंतिं ई काइगु जुइवं तत्काल मेलम्चीया लः स्वनिगलय् वइगु सम्भावा मदुगु खँ धाःगु दु। छुं ई न्ह्यः जक सुरुबय् लः परीक्षण यायेगु झ्वलय् गेटया खापा तज्यानाः दुर्घटना जूगु खः । उगु दुर्घटनाय् निम्हेसित उद्धार याःगु खःसा छम्ह सीगु खः । मेम्ह छम्ह धाःसा वेपत्ता जूगु खः । दुर्घटनया छानविन यायेत खानेपानी मन्त्रालयया सहसचिव रमाकान्त दवाडीया संयोजकत्वय् गठन
याःगु समितिं सुरुबय् दुने तयेमाःगु गेट पिने तःगुलिं दुर्घटना जूगु निष्कर्ष पिकाःगु खः ।

खतुं खानेपानी मन्त्रालयं वंगु आर्थिक दँया असार मसान्तया दुने मेलम्चीया लः स्वनिगलय् हयेगु व पाइपया परीक्षण यायेगु लक्ष्य काःगु खः । वयां लिपा वइगु मोहनिया इलय् स्वनिगःवासीया छेँय् छेँय् बहुप्रतिक्षित मेलम्चीया लः वितरण यायेगु लक्ष्य कयातःगु खःसा मेलम्चीया सुरुबय् लः परीक्षण यायेगु झ्वलय् जूगु दुर्घटनाया कारणं हाकनं मेलम्चीया लः हयेगु योजना छुं ईया निंतिं लिज्याः वंगु खः ।

दुर्घटना जूगु सुरुबय् गेट दुनें चायेके जीकथं जडान यायेगु डिजाइन यानातःगु खःसां पिने चायेके जीकथं जडान यानातःगु सीदुगु दु। दुर्घटना जूगु थासय् च्वंगु गेट उगु हे थासय् तयाः आः फ्रेम जक स्यंकाः न्हूगु जडान याइगु जूग दु। उकिया निंतिं भारतीय निर्माण कम्पनी प्राविधिकत वयाः निर्माणस्थल वनाः स्वया वंगु खः । कम्पनीलिसे न्हूगु गेट दयेकेत सम्झौता नं जुइधुंकूगु दु। न्हूगु फ्रेम दयेका हःसां नं उकियात जडान यायेत ई काइगु मन्त्रालयं न्ह्यथंगु दु ।

मन्त्रालयया प्रवक्ता रितेशकुमार शाक्यया कथं फ्रेम जोडे जुइत झण्डै २८ न्हु ई काइ । फ्रेम जडानया निंतिं सुरुब दुने आवश्यक संरचनाया नं निर्माण प्रक्रिया न्ह्याकीगु जुयाच्वंगु दु। फ्रेम व गेटया अध्ययनया निंतिं आयोजनाया परामर्शदाता कम्पनीं थप विज्ञत हयेगु तयारी याःसां नं निषेधाज्ञाया कारणं वये फयाच्वंगु अवस्था मदयाच्वंगु नं सीदुगु दु ।