न्हूगु ल्याण्डफिल्ड साइटय् ज्या सुरु

येँ – यदि सरकारं आकिवं तकया दुने नं सिसडोल ल्याण्डफिल्ड साइटया विकल्प मालाः मेगु थाय्या व्यवस्था याये मफुत धाःसा स्वनिगलय् तःधंगु महामारी ब्वलनीगु ख्याच्वः स्वनिगःया फुक्क नगरपालिकातय्सं बिउगु दु । छुं ई न्ह्यः तिनि नीस्वंगु उपत्यका नगरपालिका फोरमया म्हीग च्वंगु न्हापांगु विस्तारित बैठकय् थ्व खँ पिहां वःगु खः ।

बैठक लिपा फोरमया नायः लिसें येँ मनपाया मेयर विद्यासुन्दर शाक्यं थ्व खँ कनादीगु खः । वय्कलं धयादिल, ‘मेगु दँय् सिसडोलया विकल्प माले मफुत धाःसा स्वनिगलय् महामारी ब्वलीगु खँ जिमिसं सरकारयात धाये धुनागु दु ।’नगरपालिका फोरमया दबाब लिपा सरकारं न्हूगु ल्याण्डफिल्ड साइटया रुपय् जग्गा न्याना तःगु नुवाकोटस्थित बञ्चरेडाँडाय् आवश्यक व्यवस्था यायेगु लागिं सरकारी पुचः वनेधुंकूगु जानकारी नं मेयर शाक्यं बियादिल ।

लिसें अन तक वनेगु लँ व दथुइ लाःगु ताँ दयेकेगु जिम्मा नं सरकारयागु हे खः धकाः क्वःजीधुंकूगु कारणं थुखेपाखे नं ज्या सुरु जुइधुंकूगु खँ वय्कलं कनादिल ।
सिसडोलय् स्वनिगःया फुक्क हे नगरपालिकातय्सं फोहोर वायेगु यानाच्वंसां उकिया व्यवस्थापनया जिम्मा धाःसा येँ महानगरपालिका याकःचां कयाच्वंगु दु । छुं जुयाः सिसडोलय् समस्या वल धाःसा उकिया लिच्वः येँ जक मखु स्वनिगःया १८ गुलिं नगरपालिकाय् लाइगु खँ मेयर शाक्यं कनादीगु दु ।