तामाङ भासं आखः स्यनीम्ह मैथिली भाषी सर
येँ – मांभासं आखः ब्वने दइगु मस्तय् नैसर्गिक अधिकार खः । तर मांभासं आखः स्यनेगु लागिं वहे समुदायया जक शिक्षक जुइमाः धइगु मदु । मैथिलीभाषी शिक्षकं तामाङ भासं नं आखः स्यनेगु ज्या यायेफु । उकिया हे दसु खः सिराहाया शिक्षक भाजु रामसुन्दर यादव । सिराहा जिल्लाया मैथिली भाषी यादवं वंगु १७ दँ न्ह्यवंनिसें रसुवाया स्कूलय् प्रधानाध्यापक जुयाः ज्या याना च्वनादीगु खः ।
तामाङ जातिया घनावस्ती दुगु रसुवाया ठूलोभार्को धाःगु थासय् च्वंगु उगु स्कूलय् ब्वनीपिं विद्यार्थीत धाःसा फुक्क धइथें तामाङ जातियापिं खः । उकिं उगु स्कूलय् प्रधानाध्यापक जुयादीम्ह यादवं नं मस्तय्त तामाङ भासं हे आखः स्यनादीगु खः । थः तराईया मैथिली भासी खःसां रसुवाय् वय्कलं तामाङ भाय् ल्हानाः आखः स्यनाच्वंगु खनीबलय् धाःसा मनूत अजूचाइ ।
शिक्षण पेशाय् ४१ दँ फुकेधुंकूम्ह यादव वंगु १७ दँ न्ह्यवंनिसें धाःसा रसुवाय् दी । अन तामाङ भासं आखः स्यनेमाःगु बारे वय्कलं धयादी, ‘थन तामाङ भासं आखः स्यनेगुया मेगु विकल्प हे मदु । अंग्रेजी हे स्यनेगु खःसां तामाङ भासं स्यनेमाः ।’वय्कलं तामाङ भाय् धाःसा रसुवाय् वयाः जक सयेकादीगु मखु ।
वि.सं. २०६३÷६४ सालय् देय्या खुगू जिल्लाय् च्यागू मांभासं आखः स्यनेगु धकाः सरकारं हःगु योजनाय् वय्कलं नं ब्वति कयादीगु खः । वहे इलय् वय्कलं तामाङ भाय् सयेकादीगु खः ।
शिक्षक यादवं रसुवाय् तामाङ भासं आखः स्यनादीसां छेँय् धाःसा वय्कलं परिवारलिसे मैथिलीभासं खँ ल्हानादी । वय्कलं खस नेपाली, अंग्रेजी, हिन्दी व भोजपुरी नं बांलाक ल्हायेसः । वय्कलं कक्षाय् खस् भासं च्वयातःगु सफू तकं तामाङ भाय् हे स्यनाः थुइकेगु ज्या यानादी । मस्तय्त उमिगु हे भासं स्यनेमाःगु वय्कःया जिकिर दु ।
LEAVE YOUR COMMENTS