ख्वनाय् फास्ट ट्राय्क मदयेकेत सदनय् सः

येँ – ख्वनाय् जुयाच्वंगु फास्ट ट्राय्क निर्माणया ज्यायात कयाः म्हिगः संघीय समाजवादी फोरमया सहअध्यक्ष राजेन्द्र श्रेष्ठं विरोध यानादीगु दु । म्हिगः संसदय् न्ववायेगु झ्वलय् वय्कलं उगु विरोध यानादीगु खः । नेपाःया झिगू सांस्कृतिक धरोहर युनेस्कोया विश्व सम्पदाय् सूचीकृत जुइधुंकूगु व ख्वना झिंछगूगु विश्व सम्पदाया धलखय् सूचीकृत जुइगु लँपुइ वनाच्वंगु धासें उकियात नष्ट यायेगु ज्या राज्यं याये मजिउगु खँ कनादीगु दु । लिच्छविकालय् दयेकूगु शहरयात आःया सन्दर्भय् तुलना यानाः विकास यायेगु उचित मजूगु खँ कनादिसें अज्याःगु संरचनायात संरक्षण यायेमाःगु खँय् वय्कलं बः बियादीगु दु ।
विश्व सम्पदाय् लाइगु गुगुं नं धरोहर राष्ट्रया हे सम्पदा जुइगु जूगुलिं उकिया संरक्षण यायेगु दायित्व नं सरकारया हे जुइगु खँ नं वय्कलं धयादीगु दु ।

कन्हय् मण्डलाय् धर्ना ः
थ्वहे झ्वलय् उपत्यकाव्यापी सडक विस्तार पीडित संघर्ष समितिं कन्हय् सुथय् १० बजेनिसें येँया माइतिघर मण्डलाय् वृहत् धर्ना बीगु जूगु दु । उकी ख्वनाया पीडिततय्सं नं ब्वति काइ ।