मिसा वडा सदस्यपिनि खँ

येँ – येँ मनपाया वडा वडाय् जुइगु विकास निर्माणया ज्या गय् यानाः न्ह्यानाच्वन व उकी बजेट गय् यानाः खर्च जुयाच्वन धइगु बारे थःपिंत छुं हे जानकारी मबीगु खँ कामपाया मिसापिं वडा सदस्यतय्सं कनादीगु दु । येँ महानगरपालिका सहरी विकास योजनाया ग्वसालय् म्हिगः याःगु छगू ज्याझ्वलय् मिसापिं वडा सदस्यतय्सं थ्व गुनासो तयादीगु खः ।

ज्याझ्वलय् थीथी न्यागू पुचः दयेकाः वडाया समस्या बारे भ्वँतय् च्वकेगु ज्या जूगु खः । मिसा वडा सदस्यतय्सं वडाय् बैठक तकं मच्वँसे छक्वलं प्यंगू मिटिङया माइन्युटय् थःपिंत हस्ताक्षर याकीगु गुनासो नं तःगु खः । महानगरपालिकाय् सुशासन कायम यायेगु खःसा थज्याःगु ज्याय् सुधार याये माःगु सुझाव नं मिसापिं वडा सदस्यतय्सं तःगु खः ।

अथे हे छगू पुचः मिसा वडा सदस्यतय्सं वडाया स्थानीयवासीलिसे करया खँ ल्हायेबलय् गुलिं करदातात ल्वाः तकं वइगु जूगुलिं अज्याःगु इलय् मिसा वडा सदस्यया सुरक्षाया लागिं नगर प्रहरीया व्यवस्था यायेमाःगु बिचाः नं तःगु खः । लिसें मिसा वडा सदस्यतय्सं सुरक्षाया लागिं वडाया गल्लि गल्लिइ तकं मत तयेमाःगु, सीसी क्यामेरा तयेमाःगु सुझाव नं ज्याझ्वलय् तःगु खः ।

येँ मनपाया मेयर विद्यासुन्दर शाक्यं मिसा वडा सदस्यपिनि सुझावयात मनपां कार्यान्वयन याना वनेगु बचं बियादिल । ज्याझ्वलय् सहरी विकास योजनाया सदस्य सचिव सरोज बस्नेत, दुजः गुजेश्वरी श्रेष्ठ लिसें बसन्त आचार्यं सहजीकरण यानादीगु खः ।

सम्बन्धित बुखँ

LEAVE YOUR COMMENTS