मतयाः व ब्वगी जात्रा मजुइगु

यल (नेपालभाषा टाइम्स) – यलया नांजाःगु ऐतिहासिक मतयाः जात्रा व ब्वगी जात्रा थुगुसी मजुइगु जूगु दु । कोरोना भाइरस संक्रमण जुइफुगु जोखिमया कारणं थ्व जात्रा दिकूगु खः । थुगुसी मतयाः व ब्वगी जात्रा व्यवस्थापनया पाः लाःगु श्री रुद्रवर्ण महाविहार ओकुबहालं म्हिगः छगू विज्ञप्ति पितबिसें थुगुसी जात्रा मन्यायेकेगु जानकारी बिउगु खः । ब्वगी जात्रा वइगु साउन ६ गते निसें न्ह्याये माःगु खःसा मतयाः जात्रा वइगु साउन २१ गते लाः ।

दोलखा भिंद्यः चाल
थ्वहे दथुइ दोलखाया नांजाःगु भिंद्यः देगःया लुखा धाःसा म्हिगः निसें भक्तजनतय् निंतिं चायेकूगु दु । लकडाउन सुरु जुसां निसें बन्द जुयाच्वंगु भिंद्यः देगः ११५ न्हुया बन्द लिपा म्हिगः निसें चाये कूगु खः । देगःया पिनेया लुखा चायेकूसां देगलय् हे दुहां वनीगु मू लुखा धाःसा बन्द हे जुइ । भीमेश्वर मन्दिर गुथि तथा पूजा व्यवस्थापन समितिया अध्यक्ष भरत श्रेष्ठं दोलखाय् दछियंकं न्यायेकीगु थीथी जात्रा पर्व न्ह्याकेत भिंद्यःया देगः चाःहिके हे माःगु जूगुलिं देगः चायेकागु खँ धयादीगु दु ।