न्हूगु पार्टीइ नं बाबुराम नेतृत्वय् मच्वनीगु

येँ (नेपालभाषा टाइम्स)÷जसपा त्वःतेधुंकाः डा. बाबुराम भट्टराईं ‘नेपाल समाजवादी पार्टी’ नीस्वनीगु जूगु दु । डा. भट्टराईया स्वकीय सचिव रोशन पोखरेलं बियादीगु जानकारी कथं पार्टी गठनया न्हापांगु चरणय् वय्कः संघीय परिषदया अध्यक्ष जुयादीसां लिपा उगु थाय् नं त्वःतीगु सम्भावना दु ।

स्वकीय सचिव पोखरेलं ‘नेपालभाषा टाइम्स’ लिसे खँ ल्हासें डा. भट्टराई आः खुइच्यादँ पुलेधुंकूगुलिं मेगु पुस्तायात नेतृत्व हस्तान्तरण यायेगु पक्षय् दीगु जुयाः वय्कलं छुं ई लिपा हे पद त्वःतेगु मनस्थिति दयेकादीगु खँ कनादिल ।

आः गठन जुइगु नेपाल समाजवादी पार्टीया सांगठनिक संरचना धाःसा जनता समाजवादी पार्टी लिसे हे ज्वःलाइगु व उकिया सांगठनिक संरचनाय् संघीय परिषदया अध्यक्ष व पार्टीया निम्ह अध्यक्ष दइ । थ्व स्वम्ह अध्यक्ष मधेशी, आदिवासी जनजाति व खस आर्य समुदायपाखें प्रतिनिधित्व याकेगु तयारी जुयाच्वंगु दु ।

संघीय परिषदया अध्यक्षय् डा. भट्टराई थः हे च्वनादीगु व मेपिं निम्ह अध्यक्षय् महेन्द्र राय यादव व गंगानारायण श्रेष्ठया नां वयाच्वंगु खँ धाःगु दु । तर स्वकीय सचिव पोखरेलं धाःसा आः हे थुकिया निर्णय धाःसा मजूनिगु खँ कनादीगु दु ।

मेखे डा. भट्टराईं थः कार्यकारी अध्यक्ष जुयाः ज्या मयायेगु निर्णय यायेधुंकूगु खँ सीदुगु दु । वय्कलं आः न्हूपिं वइपिं निम्ह मध्ये छम्ह अध्यक्षयात कार्यकारी अधिकार सहित भूमिका बीगु कथं विधान तयार यानादी धुंकूगु खँ धाःगु दु ।

अथे हे पार्टी दर्ताया नितिं माःगु तयारी क्वचायेधुंकूगु खँ नं सीदुगु दु । पार्टी दर्ताया ज्या थौं वा कन्हय् जुइफइगु खँ धाःगु दु । निर्वाचन आयोगं निर्वाचनया तिथि घोषणा याये न्ह्यः हे पार्टी दर्ता यायेगु कथं तयारी जुयाच्वंगु दु । निर्वाचन घोषणा जुइधुंकाः कानुनी रुपं हे पार्टी दर्ता यायेगु ज्या दिकेमाःगु प्रावधान दुगुलिं याकनं पार्टी दर्ता यायेमाःगु खँ धाःगु दु ।

सम्बन्धित बुखँ

LEAVE YOUR COMMENTS