ने. सं. ११४६ तछलाथ्व पञ्चमी - सिद्धिचरण श्रेष्ठ बुदिं

पूच्वनिसें कुपण्डोल तक आकाश मार्ग

येँ – यल महानगरपालिकां कुपण्डोलया ट्राफिक जाम म्हो यायेगु लागिं उगु लागाय् आकाशे लँपु दयेकेगु तयारी याःगु दु । कुपण्डोलंनिसें पूच्व थ्यनीगु उगु आकाशे लँपुया निंतिं सम्भाव्यता अध्ययन न्ह्याकूगु दु । थ्व लँ दयेकेत तुइगु ध्यबा, उपयुक्त थाय्या बारे अध्ययन प्रतिवेदन वइगु खँ यल मनपाया प्रवक्ता राजु महर्जनं कनादिल ।

वय्कःया कथं अध्ययनया निंतिं यल मनपां ९८ लाख बजेट फ्यानातये धुंकूगु दु । फ्लाइ ओभर दयेकेगु निंतिं जापानी सहयोग नियोग (जाइकां) नं चिउताः क्यनाच्वंगु दु ।

तर तत्काल जाइका याकःचित बीगु खः वा मेगु साझेदारी संस्थालिसे सहकार्य यायेगु खः धइगु बारे धाःसा अध्ययन लिपा जक क्वःछीगु खँ धाःगु दु । मेखे येँ महानगरपालिकां नं त्रिपुरेश्वरंनिसें थापाथली व थापाथलीं माइतीघर तक फ्लाइओभर दयेकेत अध्ययन न्ह्याकूगु खँ सीदुगु दु ।