महिला समूह लक्षित उद्घोषण तालिम क्वचाल

यल – यल महानगरपालिका, समाज कल्याण महाशाखाया ग्वसालय् जूगु छवाःयंकंया उद्घोषण व वक्तृत्व विकास तालिम क्वचाःगु दु । महाशाखां थीथी मिसा समूहयात लक्षित यानाः उगु तालिम न्ह्याकूगु खः । महाशाखा प्रमुख बाबुराजा महर्जनया सभापतित्वय् जूगु तालिम समापन ज्याझ्वःया मूपाहां यल मनपा ५ वडाअध्यक्षलिसें सामाजिक विकास समितिया दुजः विकासमान श्रेष्ठं प्रशिक्षार्थीपिंसं दसिपौ लःल्हानादीगु खः ।

ज्याझ्वलय् नवासें वय्कलं प्रशिक्षार्थीपिंसं माग यात धाःसा एड्भान्स कोर्षया निंतिं ग्वाहालि यायेगु बचं बियादिसें तालिम कयादीपिंके विकास जूगु गुण व आत्मविश्वासं खनाः थः प्रभावित जूगु खँ कनादिल । वंगु बैशाख १६ गतेनिसें न्ह्याःगु तालिम संचारकःमि सुरजवीर वज्राचार्यं प्रशिक्षण बियादीगु खः ।

महाशाखाया महिला विकास कार्यक्रम अधिकृत ज्ञानीशोभा महर्जन विशेष पाहाकथं झायादीगु ज्याझ्वलय् प्रशिक्षार्थीतमध्ये ज्याथम्ह लक्ष्मी व्यञ्जनकारं ग्वसाः खलः महाशाखा व प्रशिक्षक वज्राचार्ययात लुमन्ति चिं लःल्हानादीगु खः ।

प्रशिक्षार्थींपिं सहिना वज्राचार्य, मथुरा सापकोटा डोटेल, गोमा खरेलं तालिमया अनुभव कनादीगु ज्याझ्वलय् प्रशिक्षार्थी विष्णुमाया थापां लसकुस यानादीगु खःसा मेम्ह प्रशिक्षार्थी उर्मिला सुवेदीं सुभाय् देछनादीगु खः ।