अश्लील साइट स्वःसां कारवाही

येँ – नेपाल दूरसञ्चार प्राधिकरणं आः अश्लील साइट स्वइपिं मनूतय्त तकं कारवाही याइगु जूगु दु । अज्याःगु अश्लील साइट स्वइपिं मनूतय्गु मोबाइल व ल्यापटप ट्रेस यानाः उमित कारवाही यायेगु खँ प्राधिकरणं धाःगु दु । अश्लील साइट स्वइम्हेसिया डिभाइस व आइएमइआइ नम्बर ट्रेस यानाः उमित कारबाही याये फइगु खँ नं प्राधिकरणं धाःगु दु ।

उकथं हे आः अश्लील वेबसाइट उपलब्ध याकीगु सेवा प्रदायक कम्पनीयात नं दूरसञ्चार प्राधिकरणं कारबाही यायेगु खँ धाःगु दु । प्राधिकरणं वेबसाइट प्रदायक संस्थायात इन्टरनेटय् दुगु अज्याःगु फुक्कं वेबसाइट बन्द यायेत निर्देशन बीधुंकूगु दु । निर्देशन पालना मयाइगु सेवा प्रदायकयात दूरसञ्चार ऐन २०५३ कथं जरिवाना व अनुमति पत्र रद्द याये फइगु नियम दु ।

अज्याःगु साइट स्वइपिं वा सेवा बीपिंत प्राधिकरणं ५ लाख तका तक जरिवाना याये फइगु खँ धाःगु दु ।देशय् बलात्कार व मिसा हिंसाया घटना अप्वयेवं सरकारं छुं नं कथंया अश्लील साइटयात प्रतिबन्ध तयेगु निर्णय याःगु खः । वहे निर्णय कथं आः दूरसञ्चार प्राधिकरणं कार्यान्वयनया पलाः न्ह्याकूगु खः ।