फास्ट ट्रयाकय् परामर्शदातायात आसयपत्र, नियम उल्लंघन याःगु धासें विरोध

येँ – नेपाली सेनां देय् लकडाउन जुयाच्वंगु इलय् तराई मधेश द्रुतमार्गया निर्माणय् अन्तर्राष्ट्रिय परामर्शदाताया निंतिं आसयपत्र बिउगु दु ।

यलया ख्वना निसें बाराया निजगढ तक दयेकेत्यंगु फास्ट ट्रयाकया परामर्शदाताया निंतिं योसिन इन्जिनियरिङ करपोरेसन, कोरिया एक्सप्रेस करपोरेसन व पियोङ्ग्वा इन्जिनियरिङ कन्सल्टेन्टया जेभीयात मंगलवाः आसयपत्र बिउगु खः ।

मंसिरय् आव्हान याःगु टेन्डरय् न्यागू कम्पनी ल्यःगु खःसां आर्थिक प्रस्ताव धाःसा निगू कम्पनीया जक चायेकूगु खः । स्वंगू कम्पनीयात प्राविधिक मूल्यांकनय् फेल यानातःगु दु । तर स्वंगू कम्पनीयात छु आधारय् फेल याःगु धकाः स्पष्ट यानातःगु मदु । नापं सेनां आर्थिक प्रस्ताव चायेकूगु न्हि कुन्हु हे सम्बन्धित कम्पनीयात आसयपत्र बिउगु धासें सेनाया विरोध सुरू जूगु दु । सेनां आसयपत्र बिउगु कम्पनीयात नेगोसिएसन यायेत तकं मसःतुसें तप्यंक आसयपत्र बिउगु धासें मेमेगू कम्पनीं आपत्ति प्वंकूगु दु ।

खरिद ऐन नियमावली कथं आसयपत्र जारी याःगु न्हय्न्हुया दुने उजुरी तयेफइगु व झिंन्यान्हुया दुने सम्झौता यायेमाःगु व्यवस्था दु ।