ने. सं. ११४४ कौलाथ्व पारू - नःलास्वनेगु

ठेकेदारं यानाः क्षतिपूर्ति पुलेमालीगु अवस्थाय् प्राधिकरण

येँ – वन क्षेत्रया जग्गा छ्यलेगु व सिमा पालेगु समस्यां यानाः सोलु करिडोर १३२ केभी प्रसारण लाइन दयेकेगु ज्या इलय् हे क्वमचाइगु जूगु दु । उगु प्रसारण लाइन इलय् क्वमचाल धाःसा नेपाल विद्युत प्राधिकरणं निजी ऊर्जा प्रवद्र्धकयात दँय् १ अर्ब ३८ करोड तका क्षतिपूर्ति पुलमालीगु खँ धाःगु दु । सोलु खुसीइ निजी क्षेत्रया २१७.५ मेगावाट क्षमताया खुगू आयोजना दयेकेगु ज्या जुयाच्वंगु दु ।

उकी मध्ये ८२ मेगावाटया तल्लो सोलु व २३.५ मेगावाटया माथिल्लो सोलु वइगु गुलाया दुने क्वचाइगु खँ धाःगु दु ।
प्राधिकरण व प्रवद्र्धन कम्पनीया दथुइ जूगु मत न्यायेगु सम्झौता (पिपिए) कथं प्रसारण लाइनया अभावय् मत केन्द्रीय प्रसारण लाइनय् स्वायेमफुत धाःसा ४५ प्रतिशत हर्जना पुलेमाःगु व्यवस्था दुगुलिं नं प्राधिकरणं प्रसारण लाइन दयेकेगु ज्यायात तीव्र यायेमाःगु खँ धाःगु दु ।

प्राधिकरणं सोलु करिडोरया प्रसारण लाइन आयोजना क्वछिनातःगु इलय् क्वचायेकेत ठेकेदार कम्पनीयात ताकेता यानाच्वंगु दु तर ठेकदार कम्पनीं प्राधिकरणया ताकेतायात अटेर यानाच्वंगु दु । उगु प्रसारण लाइन दयेकेगु ठेक्का भारतया मोहना इनर्जीं काःगु खः ।

प्रसारण लाइन दयेकेगु ज्याय् संलग्न ठेकेदार कम्पनीं प्रभावकारी ज्या मयाःगुलिं प्राधिकरणया कार्यकारी निर्देशक कुलमान घिसिङ नेतृत्वया पुचः सोलखुम्बुया तिङ्लाय् दयेकाच्वंगु १३२ केभी क्षमताया सबस्टेसन व प्रसारण लाइनया स्थलगत निरीक्षण यानाः इलय् ज्या क्वचायेकेत आयोजनाया व्यवस्थापन व परामर्शदाता कम्पनीयात निर्देशन बिउगु दु ।