पद्मरत्नया जहान मंत मंगलवाः लुतिइ अन्त्येष्टि याइगु

येँ । नेवाः न्ह्यलुवा लिसें वरिष्ठ मानव अधिकारवादी नेता पद्मरत्न तुलाधरया जहान नीलशोभा तुलाधर मंत । म्हिगः सोमवाः बहनी ९ बजे वय्कः आकाझाकां मदुगु खः । मदुम्ह तुलाधर ७८ दँ दुम्ह खः ।

मदुम्ह तुलाधरया कायभाजु सर्वन तुलाधरं नेपालभाषा टाइम्स यात कनादीकथं सोमवाः थःगु हे छेँय् द्यनाच्वंम्ह वय्कःयात आकाझाकां हृदयाघात जूगु खः । हृदयाघात जूगुयां १५ मिनेटं हे वय्कः मदुगु खः । अस्पताल यंकूबलय् वय्कः मदयेधुंकूगु खँ चिकित्सकतय्सं धाःगु खः ।

आः मंगलवाः हे वय्कःया अन्त्येष्टि याइगु खँ छेँजःपिंसं धाःगु दु । वय्कःया सीम्हयात अस्पतालं तप्यंक लुतिइ यंकेगु ग्वसाः जुयाच्वंगु दु । लुतिइ सिथं यंकीबलय् ११–१२ बजे जुइफुगु खँ नं छेँजःपिंसं धाःगु दु ।

भाजु पद्मरत्न तुलाधर थनिं प्यदँ न्ह्यः मदुगु खः । मदुपिं तुलाधर तिपूया काय निम्ह व म्ह्याय् निम्ह दी । भाजु तुलाधरयात भाषा आन्दोलन, जनजाति आन्दोलन, मानव अधिकार आन्दोलनया ख्यलय् सक्रिय जुयाः न्ह्यब्वायेत मय्जु तुलाधरं अप्रत्यक्ष रुपं आपालं ग्वाहालि यानादीगु खँ भाजु तुलाधरं कनेगु यानादी ।

येँया असं त्वालय् जन्म जुयादीम्ह मय्जु तुलाधर १४ दँ जक दुबलय् १८ दँ दुम्ह पद्मरत्न तुलाधरलिसे इहिपा जूगु खः ।

 

सम्बन्धित बुखँ

LEAVE YOUR COMMENTS