तनहुँ हाइड्रोया मेगु आयोजना

येँ – तनहुँ हाइड्रो पावर कम्पनीं मेगु छगू आयोजना नं दयेकीगु जूगु दु । १४० मेगावाटया सेती जलविद्युत आयोजना दयेकाच्वंगु आयोजनां १०४ मेवागाटया मेगु आयोजन दयेकेगु निंतिं विस्तृत अध्ययन प्रतिवेदन (डीपीआर) दयेकेगु ज्या न्ह्याकेत्यंगु दु । आयोजनां डीपीआर व बोलपत्रया निंतिं खुगू परामर्शदाता ल्यया तयेधुंकूगु दु ।

लिसें डीपीआर दयेकेगु निंतिं बोलपत्र नं आह्वान यायेधुंकूगु दु । डीपीआर दयेकेगु निंतिं एसियाली विकास बैंकं ३३ करोड तका अनुदान ग्वाहालि याइगु जूगु दु । दत्याया दुने डीपीआर तयार यायेगु कथं ज्या जुयाच्वंगु दुसा आयोजना सन् २०२३ निसे दयेकेगु कथं तयारी जुयाच्वंगु खँ आयोजनाया प्रबन्ध निर्देशक प्रदीपकुमार थिकें कनादीगु दु ।

आयोजनाय् एडीबी व जापान अन्तर्राष्ट्रिय सहयोग नियोग (जाइका) या लगानी दइगु खँ धाःगु दु । तर सम्झौता धाःसा मजूनि । कम्पनीं दयेकाच्वंगु १४० मेगावाटया तनहुँ सेतीइ एडीबी व जाइकाया लगानी दु । आयोजना क्वचायेकेगु निंतिं २२ अर्ब तक तुइगु अनुमान यानातःगु दु । आयोजनाय् सर्वसाधारण जनतायात नं लगानी याकेगु कथं तयारी जुयाच्वंगु दु । आयोजनाया प्रतिफल २० प्रतिशत जुइगु अनुमान यानातःगु दु ।