आकर्षण म्हो जुयाच्वंगु हुलाक सेवा

१४४ क्वःगु विश्व हुलाक दिवस

गुगुं इलय् हुलाक सेवा सर्वसाधारणया मन मस्तिष्कय् दयाच्वंगु खः । सूचनाया छगू जक माध्यम जूगुलिं हुलाकया सुं नं कर्मचारीयात खनेवं न्हूगु खबर जकं वल ला धइथें च्वनीगु खः । सूचना व प्रविधिया विकास नापनापं म्हो जुया वंगु हुलाकया आकर्षण थहां वये फयाच्वंगु मदु । प्रविधि व ईया मागकथं न्ह्याये मफयेवं नेपाःया हुलाक सेवाप्रति सर्वसाधारणया आकर्षण कुहां वयाच्वंगु दु ।

विश्वय् हुलाकं उच्चस्तरीय सेवा प्रदान याना वयाच्वंसां नेपालय् आवश्यकताकथं न्ह्याये मफयेवं हुलाक सेवा प्रभावकारी जुइ मफयाच्वंगु खः । संचार व सूचना प्रविधि मन्त्रालयया निमित्त सचिव वीरेन्द्रकुमार मिश्रं सूचना व प्रविधिया माध्यम हिला वंगुलिं सेवा आधुनिकीकरण याये फत धाःसा अझं हुलाकया आवश्यकता दु धयादी ।

म्हिगः १४४ क्वःगु विश्व हुलाक दिवस न्यायेकल । थ्व दिवस न्यायेकाच्वंगु इलय् थुकिया सेवा चुस्त जुइ मफुगु खँय् धाःसा चिउताः प्वंकूगु दु । थनिं दछि न्ह्यःया तुलनाय् थगुने चिठीपत्र कालबिल यायेगु ज्याय् ३ दशमलव ४ प्रतिशतं कुहां वःगु गोश्वारा हुलाक ज्याकू येँया प्रमुख हुलाक अधिकृत वेदप्रसाद भण्डारीं धयादिल ।

नेपालय् थीथी चुनौतिया दथुइ ज्या यायेमालाच्वंगुलिं सेवा प्रभावकारी दयेके मफयाच्वंगु भण्डारीं धयादी । यद्यपि चुनौतिया दथुइ नं हुलाकया पार्सल (पुलिन्दा) व व्यावसायिक सेवाय् आकर्षण अप्वयाच्वंगु भण्डारीं दावी यानादी । वंगु दँय् पार्सल १२ दशमललव ५ प्रतिशतं अप्वःगु खः ।

हुलाकया कुल ५० करोड राजस्वमध्ये न्हापांगु ल्याखय् द्रुत डाँक सेवा, अनं लिपा पार्सल व चिठीपत्रपाखें म्हो वयेगु यानाच्वंगु दु । ‘चिठीपत्र कुहां वयाच्वंगु दु, पार्सल व व्यावसायिक सेवाया माग अप्वयाच्वंगु दु’, भण्डारीं धयादिल, ‘व्यावसायिक सेवा बीगु खः धइगु जूसां हुलाकया प्रभावकारिता दयाच्वनी । आः व्यावसायिकताय् वनेगुया विकल्प मदु ।’

जापानय् दुरु लगायत खाद्य सेवा हुलाकपाखें हे उपलब्ध जुइ । भुटानय् हुलाक बस सेवा दु, गुगु कोलकाता तक वनी । नेपालय् नं थज्याःगु व्यावसायिक सेवा हयेमाःगु आवश्यक खने दु । नेपालय् स्वनिगःया स्वंगू जिल्लाय् शुरु जूगु घुम्ती सेवातकं देय्न्यंकं विस्तार याये फयाच्वंगु मदु । हुलाक सेवा विभागया महानिर्देशक आनन्दराम रेग्मीं हुलाकया गरिमा व महत्व कायम यायेत कर्मचारी छप्पँ जुयाः लगे जुइमाः धयादी ।

स्थिर सरकार दुगुलिं नं सेवा प्रभावकारी जुइगु खँय् वय्कलं आशा यानादी । गोश्वारा हुलाकया कथं ३० प्रतिशत दरबन्दी प्वनाच्वंगु, प्रविधियात आत्मसात याये मफुगु, सेवा रुपान्तरण याये मफुगु, बजेटया अभाव व हुलाकप्रति स्वयेगु दृष्टिकोण नकारात्मक जूगुलिं समस्या जुयाच्वंगु दु ।

सेवा विस्तार यायेत सरकारं दयेकूगु हुलाक सुधार कार्यदलया संयोजक राजेन्द्रप्रसाद शर्मां संचार क्षेत्रया पुलांगु सेवा दयनीय जुया वनाच्वंगुलिं स्वायत्त संस्थाया रुपय् विकास यानाः सेवा ईयात ल्वःकथं दयेकेमाः धयादिल । कार्यदल थुकी हे केन्द्रीत जुयाः ज्या यानाच्वंगु वय्कलं जानकारी बियादिल ।

सूचना व प्रशारण विभागया महानिर्देशक बालकृष्ण घिमिरें हुलाक सेवा सरकारया प्राथमिकत(ाय् मलाःगु धयादी । नेपालय् अतिरिक्त हुलाक कर्मचारी एशोसियसनया अध्यक्ष टंक हुमागाइं प्रविधिमैत्री दयेकाः मेमेगु देय्या हुलाकं थें हे सेवा बीमाःगु आवश्यक जूगु कुलादिल ।
तथ्यांककथं विश्वय् १९२ देय्या खुगू लाख ज्याकुथिइ न्यय्स्वंगू लाख हुलाककर्मि दु ।

गुगुं इलय् चीन व इजिप्टय् हुलाक सेवाया संरचना दयेकूगु खः । आधुनिक हुलाक सेवाया शुरुवात सन् १६३५ य् जूगु खः । सन् १८७८ य् विश्व हुलाक संघया स्थापना जूगु खः । नेपालय् धाःसा १९३५ निसें हुलाक सेवा शुरु जूगु खः । सन् १९५६ य् नेपालं विश्व हुलाक संघया सदस्यता काःगु खः । थौंकन्हय् ७० गू जिल्लाय् ८४२ इलाका व स्वद्वः स्वयां अप्वः अतिरिक्त हुलाक ज्याकू दु ।

अथे हे झिंन्हय्द्वः जनशक्ति परिचालित जुयाच्वंगु दु । नेपाःपाखें ३९ गू देशय् द्रुत डाँकसेवा संचालन जुयाच्वंगु दु । थ्व हे झ्वलय् स्वनिगलय् १४४ क्वःगु विश्व हुलाक दिवस हुलाक सेवा विभाग व गोश्वारा हुलाक ज्याकुथिं थीथी ज्याझ्वः यासें हन ।

संचार व सूचना प्रविधि मन्त्रालयया निमित्त सचिव वीरेन्द्रकुमार मिश्रं पती टाँचा तयाः ज्याझ्वःया उलेज्या यानादीगु खः । थ्व हे सन्दर्भय् येँय् हुलाकय् उत्कृष्ट सेवा बिउम्ह कर्मचारीयात सम्मान नं याःगु दु । पुरस्कृति जूपिं कर्मचारीइ जुजुकाजी डंगोल, नन्दा पौडेल व दीपक घिमिरे खः ।

सम्बन्धित बुखँ

LEAVE YOUR COMMENTS