हरिभवन थुनाः दयेकेत समस्या मदु ः शाक्य

येँ – येँ महानगरपालिकां थःगु मूज्याकू तयातःगु तत्कालिन बाघदरवार (हरिभवन) पुनःनिर्माण यायेत छुं नं समस्या मजुइगु जुइमखु धाःगु दु । येँ मनपाया प्रमुख विद्यासुन्दर शाक्यं हरिभवन निर्माण जूगु सछिदँ मथ्यंनिगुलिं समस्या मजुइगु स्पष्ट यानादीगु खः ।

प्रमुख शाक्यं आः थःपिंसं दयेकेत्यनागु बाघदरवार मखसे हरिभवन जूगु व थ्व भवन निर्माण जूगु १०० दँ मथ्यंनिगुलिं थ्व पुरातात्विक मखु धयादिल । लिसें वय्कलं भवन थुने मजिउ धइगु खँय् छुं कारण नं मदु धयादिल ।पुरातत्व संरक्षण ऐनकथं सछिदँ पुलांगु भवन वा सम्पदा सुरक्षित रुपं संरक्षण यानातयेमाःगु प्रावधान दु ।

सर्वोच्चया न्यायाधिश दीपकराज जोशीया एकल इजलासं वंगु बुधवाः बाघदरवार मथुनेत धासें अन्तरिम आदेश जारी याःगु खः । तःभुखाचं क्षतिग्रस्त जुइवं मनपां उगु भवन थुनाः न्हूगु दयेकेगु तयारी यानाच्वंगु खः । थ्व हे इलय् उगु भवन ऐतिहासिक दरवार जूगु दावी यासें भवन मथुनेत आदेश जारी यायेत माग यासें अदालतय् रिट दायर याःगु खः ।