ब्वइम्ह फ्याकधों

ब्वइम्ह फ्याकाधों (फ्लाइंग फक्स) धाथें फ्याकाधों हे मखु, छताजियाम्ह चिकंलापा खः । थ्व चिकंलापाया ख्वाः व छ्यं फ्याकाधोंयागु थें च्वंगुलिं थ्वयागु नां ब्वइम्ह फ्याकाधों जूगु खः ।चिकंलापा अप्वः थें चिचिधिकः जुइ, अले काचाक स्वयेबलय् छुँ थें च्वनी, तर थ्व ब्वइम्ह फ्याकाधों नांयाम्ह चिकंलापा चिधिकःम्ह खिचा थें च्वनी ।

थ्वयागु पपू चकंकीबलय् २ मीटर तक दइ । थ्वयागु वा ताःहाकः जुयाः च्वामुसे च्वनी । थ्वं थःगु वां नैंक्याः तक तछ्यायेफु । थ्वयागु म्हया तौल १.५ किलोग्राम तक दइ ।थ्वयात भारत, अष्ट्रेलिया, मलेशिया व एशिया दुने लाःगु मेगु छुं छुं देशय् नं झीसं खंकेफइ । वैज्ञानिकतय्सं आतकया दुने थुमिगु ६५ गू जात लुइके धुंकल ।

थुमिगु छुं छुं जात हिन्द महासागर व प्रशान्त महासागरया थीथी द्वीपय् नं लुयावःगु दु । थुमिगु अप्वः थें स्वभाव मेमेपिं चिकंलापातलिसे हे ज्वः लाः, तर छुं छुं स्वभाव धाःसा इपिं स्वयां पाः । दसुया निंतिं थुपिं सिसाबुसा नयाः हे जक जीवन हनीपिं खः । थुमिसं थः वनेमाःगु लँ मेपिं चिकंलापा थें ध्वनि तरंगया ग्वाहालिं म्हसीकेगु मयासे थःगु मिखां स्वयाः हे म्हसीकी । द्वलंद्वः बथां दयेकाः थुपिं अप्वः थें सि सयाच्वंगु सिमाय् च्वनाच्वनी ।