खुदँतक गुफाय् च्वनाच्वंम्ह फै

धार्मिक फिल्मय् द्यःपिं गुप्तवास च्वंगु झीसं स्वया वयाच्वनागु हे खः । अथे हे आदिम युगय् नं मनूत गुफा दुने वा गुप्तवास च्वनीगु खः । जंगली जनावरनिसें झंगःपछि नं गुफा दुने च्वं । तर छम्ह फै गुफा दुने सुलाच्वंगु व नं खुदँतक च्वनाच्वंगु धइगु खँ न्यनेबलय् पत्याः यायेत थाकुइफु ।

खः, न्यूजिल्याण्डया छम्ह फै थथे हे खुदँ तक गुफाय् च्वनाच्वंगु अवस्थाय् लुइकूगु दु । घटना सन् १९९७ या खः । उगु इलय् छम्ह स्थानीय मनुखं थःगु फार्मय् लहिनातःपिं झण्डै झिंन्हय्द्वः फैमध्ये छम्ह तसकं ग्याफराम्ह व जिद्दीम्ह फै नं दुगु जुयाच्वन । छन्हु उम्ह फै लहिनातःम्ह मनुखं इपिं सकलें फैतय्त ऊन लिकायेत धकाः फार्मं पित हल, व हे इलय् उम्ह जिद्दीम्ह फै धाःसा सुतुक्क धायेक गुफा दुने दुहां वन ।

अनंलिपा खुदँ तक धइथें उम्ह फै थः मालिकया मिखा छले यानाः गुफा दुने हे च्वनाच्वन । छन्हु छपुचः मनूत गुफाय् दुहां वंगु इलय् इमिसं उम्ह फैयात खंकल, तर उगु इलय् इमिसं व फै हे खः धइगु सीकेत मफुत । छाय्कि व इलय् उमेरया ल्याखं ४ दँ दुबलय् गुफाय् दुहां वंम्ह फै गुफां पित हःगु इलय् १० दँ दयेधुंकूगु जक मखसे वयागु म्हय् थुलि सँ दयाच्वने धुंकूगु जुयाच्वन कि, वयागु म्हय् नीम्हेसित गाक्क शूट दयेकेत सँ (ऊनं) दयाच्वने धुंकूगु जुयाच्वन ।

फैया ख्वाःतकं बांलाक खने मदयाच्वंगु व गुफा दुने काचाक्क स्वयेबलय् ल्वहं थें ग्वाराचा चिनाच्वंगु खनेदुगु खः । लिपा उम्ह फैया म्हय्च्वंगु दक्वं ऊन जम्मा याःबलय् ६० पाउण्ड ऊन पिहां वःगु खः । खुदँ तक गुफा दुने च्वनाच्वंम्ह उम्ह फैयात लिपा ‘श्रेक’ नां बिउगु खः, थ्व नां एनिमेटेड फिल्मया पात्र खः । अले वयागु म्हं पिहां वःगु ऊन नं तसकं थिकेक लिलाम याःगु खः ।