धुं ज्वनीम्ह खिचा

मनूलिसे दकलय् सतीम्ह जनावर खः खिचा । थ्व खँ सकसिनं सिउगु हे खः । उकिं खिचायात मात्र जनावरया रुपय् जक मकासे वयात छेँजः थें हे मान सम्मान बीपिं नं दु । खिचा मनूलिसे सतीम्ह जनावर जक मखु, अतिकं सहयोगी नं खः । मनुखं थःगु छेँया सुरक्षा यायेत नं खिचा लहीगु याःसा प्रहरी सेनां अपराधी पत्ता लगे यायेत खिचा लहीगु याः ।

जंगली हिंस्रक जनावर ज्वनेत खिचाया प्रयोग जूगु धइगु आतक न्यने नंगु मदुनि । उकिसनं नरभक्षी धुँ ज्वनेत खिचा परिचालन याःगु धइगु ला गुब्सं न्यना तकं मदु । तर भारतया महाराष्ट्रया यावतमाला जिल्लाया छगू लागाय् लिपांगु इलय् तसकं आतंक न्यंकाच्वंपिं मिसाम्ह धुँ ज्वनेत निम्ह खिचा परिचालन याःगु दु ।

उम्ह धुँयात नियन्त्रणय् कायेत आपालं कुतः याःसां प्रशासनं उकी सफलता चूलाके मफयेवं गामय् आतंक न्यंकाच्वंम्ह धुँ ज्वनेत खिचा परिचालन याःगु दु । हैदरावादया छम्ह शार्प सुटर नवाब अली खान थम्हं लहिनातःम्ह तसकं ग्यानापुम्ह केन कोरसो प्रजातिया विशेष खिचायात धुँ नियन्त्रण यायेत परिचालन याःगु खः ।

धुँ नियन्त्रणय् कायेत खिचा परिचालन याये न्ह्यः अधिकारीतय्सं ताःहाकः सहलह यायेधुंकाः खिचा परिचालन यायेगु निर्णय याःगु खः ।
इटालीयन प्रजातिया थ्व खिचायात ‘इटालीयन मास्तिफ’ नं धायेगु याःसा थ्व प्रजातिया खिचायात इटालीइ दँदँ न्ह्यःनिसें ‘गार्ड डग’ या रुपय् छ्यलेगु याना वयाच्वंगु दु । विश्वया आपालं देय्या प्रहरीं थ्व प्रजातिया खिचा विशेष यानाः अपराधी ज्वनेत छ्यलेगु याना वयाच्वंगु दु ।