सु जुइगु खः नेवाः सुपरस्टार ?

नेवाः सुपरस्टार सु जुइगु खः धयागु खँ थौंकन्हय् नेवाः फिल्म ख्यःया भिंचितामिपिनि दथुइ चर्चाया विषय जुयाच्वंगु दु । जापानय् च्वना वयाच्वंम्ह नेवाः सुनिलकुमार शाक्यया कुतलय् नीस्वंगु ग्लोबल नेपाः फाउन्डेशनया कुतलय् नेपाःया फिल्म ख्यलय् हे न्हापांखुसी जुइत्यंगु नेवाः सुपरस्टार सिरपाः ज्याझ्वः जुइत्यंगु दु ।

थुगुसी न्हापांखुसी जुइत्यंगु थ्व सिरपाःया निंतिं अभिनय याइपिं कलाकारत मध्ये मिजं छम्ह व मिसा छम्हेसित सुपरस्टार घोषणा यानाः म्हतिं छगू छगू लाख तकाया सिरपाः बीगुया निंतिं छुं न्हि न्ह्यःतिनि न्याम्ह मिजं व न्याम्ह मिसा कलाकारया नां ल्यये नं धुंकल । नां ल्ययेगु ताःतुनाः जूगु ज्याझ्वलय् नेपालभाषा फिल्म ख्यःया तसकं लोकंह्वाःम्ह हिरोइन आशिष्मा नकःमिया धाःसा उपस्थिति मदु ।

वय्कः थौंकन्हय् अमेरिकाय् च्वंच्वनादीगु दु । अन उपस्थित जूपिं मध्ये जक नां ल्ययेगु धकाः ग्वसाः खलकं घोषणा यानातःगुलिं भिंतुना जोशी धाःसा थः भारतया न्हूदिल्लीनिसें वयाः जूसां उगु ज्याझ्वलय् थ्यंकःवःगु खः । उगु ज्याझ्वलय् भिंतुना फिल्मया निम्ह हिरोइनत रेश्मी महर्जन व रेमा महर्जनया नं उपस्थिति मदु ।

अले थौंकन्हय् राइजिङ्ग स्टारया रूपय् बय्बय् जुयाच्वंम्ह निकी महर्जनया नापनापं ख्वपया कलाकार तिपू श्यामसुन्दर शिल्पकार व अर्णेश्वरी शिल्पकार अनंलि साप हे नांजाःम्ह कलाकार हृदयप्रसाद मिश्र लगायतया नं उपस्थिति खनेमदु । ‘पटाचार’ व ‘कृषा गौतमी’ म्हितूपिं नेपाःया हे नांजाःपिं कलाकारत मेलिना मानन्धर व कर्मा व कलाकार व निर्देशकया रूपय् लोकंह्वाःम्ह रवि डंगोलया नं उपस्थिति खनेमदु ।उपस्थित जूपिं दथुइ ल्यज्या जुयाः टप फाइभ नोमिनेशनय् लाःपिं फिल्म स्टारतय्गु बारे छपुलु दुवाला स्वये ।

अन्नपूर्णेश्वरी श्रेष्ठ
ने.सं. १११५ पाखे अभिनय यात्रा न्ह्याकूम्ह कलाकार अन्नपूर्णेश्वरी श्रेष्ठयात आपाःसिनं म्हसीकूगु धयागु श्रीकृष्ण अणुं दयेकूगु टेलिफिल्म ‘तंबैंक’पाखें खः । उगु इलंनिसें दिपाः मदयेक अभिनय यात्रा न्ह्याका वयाच्वंम्ह कलाकार अन्नपूर्णेश्वरी श्रेष्ठं मुक्कं न्यय्न्यागू फिल्मय् अभिनय यायेधुंकूगु दुसा झिगूति टेलिफिल्मय् नं म्हितेधुंकूगु दु । विशेष यानाः ‘स्वय्नगु’ ‘वल वल फसिक्वाः’, ‘कृषा गौतमी’, ‘पटाचारा’, ‘वाया दुने जाकि दु’, ‘थ्व ला ग्यानापु स्टाइल’ थेंज्याःगु आपालं फिल्मय् वय्कःया अभिनय स्वयेदुसा याकनं हे ‘हिसिमति’ व ‘जामनः गुभाजु’ थेंज्याःगु आपालं न्हूगु नेवाः फिल्मय् नं वय्कःया अभिनय खनेदयेत्यंगु दु ।
आर्यम नकःमि
नेवाः फिल्मया निर्माणया ज्या हे दिनाच्वंगु इलय् ‘न्याल्लब्यां’ नांयागु फिल्म दयेकाः नेवाः फिल्म ख्यःयात पुनर्जागृत याःम्ह फिल्मकःमि कथं कयातःम्ह आर्यम नकःमि छम्ह निर्देशक खःसां वय्कः छम्ह कलाकार नं खः । आर्यम नकःमिं ने.सं. ११२० पाखे फिल्मय् पलाः न्ह्याकूगु खःसा वय्कलं ‘धाःसा धाल धाइ’, ‘बाज्याया ग्वाय्’ व ‘माया’ थेंज्याःगु गुलिखे नेवाः फिल्मय् मेन रोल म्हितातःगु दुसा टेलिभिजनय् पिदना वयाच्वंगु ‘ड्याड सन् एण्ड मम’ सिरियलय् नं मेन रोल म्हितातःगु दु ।
भिंतुना जोशी
मचाबलय् निसें हे अभिनय ख्यलय् पलाः न्याकूम्ह भिंतुना जोशीया न्हापांगु नेवाः फिल्म धइगु ‘यांमिखा’ खः । नेवाः फिल्मया ख्यलय् छम्ह लोकंह्वाःम्ह हिरोइनया रूपय् कयातःम्ह भिंतुना जोशी आपालं नेवाः फिल्मय् मेन रोल म्हितूगु दु । विशेष यानाः‘याकः म्ह्याय्’ व ‘न्हाय्कं’ वय्कः मय्जुयात छम्ह बांलाःम्ह कलाकारया रूपय् पलाः क्वातुकेत ग्वाहालि याःगु छुं छुं नेवाः फिल्म खःसा वय्कलं ‘मनू म्हसीकि’, ‘थ्वला ग्यानापु स्टाइल’, ‘मतिनाया कली’, ‘याहु’, ‘तारेमाम’, ‘मू मदुगु जिन्दगी’ लगायत नीन्यागूति नेवाः फिल्म म्हितूगु दुसा आः तकया दकलय् लिपांगु फिल्म धयागु ‘स्वय्नगु’ खः । निर्माण जुयाच्वंगु ‘मां’ नांयागु न्हूगु फिल्मय् नं वय्कलं मेन रोल म्हितीगु खँ दु ।
भोगेन्द्र मानन्धर
ने.सं. ११२१ य् फिल्म ख्यलय् पलाः न्ह्याकूम्ह भोगेन्द्र मानन्धरं ‘जिपिं बदमास मखु’ फिल्मय् प्यम्ह हिरोत मध्ये छम्ह जुयाः म्हितूगु खःसा तसकं लोकंह्वाःगु नेवाः फिल्म ‘पानवति’ फिल्मय् नं बांलाःगु भूमिकाय् अभिनय याःगु दुसा विशेष यानाः वय्कः भाजु छम्ह तसकं हे दुग्यंम्ह नृत्य कलाकार खः । नृत्यया दक्वं विधाय् जाःम्ह भोगेन्द्र मानन्धरया कालभैरव चर्या प्याखं स्वःपिं सकसिनं वय्कःया तारिफ यायेगु या । उलि जक मखसे वय्कःया श्रृंगार कलाया नं आपाःसिनं तारिफ हे यायेगु याः । वय्कलं ‘थ्व ला ग्यानापु स्टाइल’ नांयागु छगू फिल्मया निर्देशन नं याःगु दु ।
रजनी खड्गी
ने.सं. ११३१ पाखे तिनि फिल्मय् खनेदय्कः वःम्ह रजनी खड्गीं आःतकया दुने न्हय्गू नेवाः फिल्म म्हिते धुंकूगु दुसा आपालं नेवाः म्युजिक भिडियो म्हितेधुंकूगु दु । विशेष यानाः ‘समयबजि’ ज्याझ्वलय् खनेदयेकः वइम्ह रजनी खड्गीया छगू च्वछायेबहगु फिल्म धइगु ‘पागलपन’ खः । थ्व फिल्मय् वयागु अभिनययात आपाःसिनं तारिफ याःगु खःसा वयागु मेमेगु फिल्मय् ‘ब्याहा याये म्हाः’ नं खः ।
राजु महर्जन
ने.सं. ११२३ निसें अभिनय यात्रा न्ह्याकूम्ह कलाकार राजु महर्जनया दकलय् च्वछायेबहगु फिल्म ‘याकः म्ह्याय्’ खः । झिंछगू नेवाः फिल्म म्हितेधुंकूम्ह कलाकार राजु महर्जनया मेमेगु फिल्मय् ‘जिपिं बदमाश मखु’, ‘मिजं’, ‘हाकु सुपाँय्’ खःसा वय्कलं ‘पानबति’ फिल्मय् पाहाँ कथं नं म्हितूगु दु । छुं ई न्ह्यवंनिसें नेवाः फिल्म पाखे तापानाच्वंम्ह राजु महर्जनया आः याकनं हे ‘रश्मी’ नांयागु फिल्म पिदनेत्यंगु दु ।
रूपेन्द्र श्रेष्ठ
रूपेन्द्र श्रेष्ठ थक्वाःया रूपय् म्हसीका दुम्ह कलाकारं आपालं नेवाः फिल्मय् थीथी कथंया भूमिकाय् अभिनय याःगु दु । ने.सं. १११८ पाखे अभिनय यात्रा न्ह्याकूम्ह रूपेन्द्र श्रेष्ठं ‘हसना’ नांयागु नेवाः फिल्मय् याःगु एड्स ल्वगिया भूमिकायात आपाःसिनं तारिफ याःगु खःसा वय्कलं नीन्यागूति नेवाः फिल्म म्हितेधुंकूगु दु । उकी मध्ये ‘तिनतिकः महाबिकः’ नं छगू खःसा थौंकन्हय् वय्कःया ‘जामनः गुभाजु’, ‘लाखेभाजु’, ‘च्वापुफय्’ थेंज्याःगु तसकं बय्बय् जुयाच्वंगु फिल्मत पिहां वयेगु लँपुइ लानाच्वंगु दु । थीथी स्टेज प्रोग्रामय् नं कलाकारिता न्ह्यब्वया वयाच्वंम्ह रूपेन्द्रं दयेकूगु म्युजिक भिडियो नं आपालं लोकंह्वाःगु दु ।
रोजिना सुवाल
‘चन्द्रमान’ नांयागु फिल्मया लुखां ने.सं. ११२९ पाखे पिलूवःम्ह रोजिना सुवालं आःतकया दुने प्यंगू नेवाः फिल्म म्हितेधुंकूगु दुसा आपालं म्युजिक भिडियो नं म्हितूगु दु । विशेष यानाः रोजिनायात ‘थ्व ला ग्यानापु स्टाइल’ फिल्मय् पुलिस इन्स्पेक्टर जुयाः म्हितूगु भूमिकाया कारणं लुमंकेगु याः ।
सुरज ब्यञ्जनकार
ने.सं. १११० पाखे निसें कलाकारिता ख्यलय् पलाः न्ह्याकूम्ह सुरज व्यञ्जनकारयात आपाःसिनं छम्ह म्ये हालामि वा संगीतकःमिया रूपय् म्हसीका वयाच्वंगु दुसा वय्कः छम्ह बांलाःम्ह कलाकार नं खः धयागु खँ नं आपाःसिनं सिउगु हे खँ खः । झिंन्यादँति न्ह्यः पिहां वःगु ‘मतिनाया कलि’ वय्कःया छगू च्वछायेबहगु फिल्म खःसा छुं ई न्ह्यःतिनि पिहां वःगु ‘स्वय्नगु’ फिल्मय् वय्कलं याःगु भूमिकायात आपाःसिनं तारिफ हे याःगु दु । थौंकन्हय् वय्कःया ‘जामनः गुभाजु’, ‘लाखेभाजु’, ‘च्वापुफय्’ थेंज्याःगु तसकं बय्बय् जुयाच्वंगु फिल्मत पिहां वयेगु लँपुइ लानाच्वंगु दु ।
हिसिला महर्जन
ने.सं. १११६ य् पिदंगु नेवाः फिल्म ‘राजमति’या राजमति रूपय् लोकंह्वाःम्ह हिसिला महर्जनया वास्तविक नां हिराशोभा महर्जन खः । छुं छुं नाटकय् नं अभिनय याःम्ह हिसिला महर्जनं ‘राजमति’ पिहां वःगु छुं ई लिपा हे बौद्ध बाखनय् दयेकूगु ‘चण्डालिका’य् नं म्हितूगु खःसा अनं लिपा कलाकार मणि राजलवटलिसे इहिपा यानाः तिपू जीवन हना वयाच्वंगु खः । लिपांगु इलय् नेवाः म्युजिक भिडियो म्हिताच्वंम्ह खःसा लिपा वनाः ‘त्याग’ व ‘कीर्तिपुर ः द लिजेन्ड अफ कीर्तिलक्ष्मी’ फिल्मय् मेन रोल म्हितलसा ‘तुयुमति’ फिल्मय् पाहां कथं खनेदयेकः वःगु खः ।
दकलय् लिपा
थुकथं टप फाइभ नोमिनेशनय् लानाच्वंपिं न्याम्ह मिजं कलाकार व न्याम्ह मिसा कलाकार दथुइ आः सुनां सिरपाः त्याकी, अथे धयागु सु नेपाः सुपरस्टार जुइ धयागु ला लिपा हे तिनि सीदइसा थुकियात कयाः चर्चा धाःसा थौंकन्हय् अप्वया वयाच्वंगु दु ।