मिस नेवाः पोखराय् २५ म्ह प्रतिस्पर्धी

येँ- मिस नेवाः पोखरा–११४० या निंतिं नीन्याम्ह प्रतियोगी छनोट जूगु दु । नेवाः खलः कास्कीया ग्वसालय् जुइगु कासाया निंतिं वंगु आइतवाः जूगु अडिसनपाखें कासामिया अन्तिम छनोट याःगु खः । कासाया निंतिं १६ दँनिसें २२ दँ दुपिं मिसापिं छनोट याःगु खः ।

कासाया संयोजक विमल श्रेष्ठं बियादीगु जानकारीकथं छनोट जूपिं प्रतियोगीपिंत २८ न्हु तक थीथी कथंया तालिम व प्रशिक्षण बी । संयोजक श्रेष्ठया कथं कासाया निंतिं छनोट जूपिंत नेपालभाषा, नेवाः सभ्यता, व्यक्तित्व, नेतृत्व व क्षमता अभिवृद्धि, नेवाः संस्कृति, नखःचखः, नेवाः प्याखं व लोक संगीत लगायतया थीथी पक्ष बारे जानकारी व प्रशिक्षण बी ।

नेवाः खलः कास्कीया नायः अशोक पालिखें थ्व मात्र सुन्दरी प्रतियोगिता जक मखसे नेवाः भाय्, कला, संस्कृति, नेवाः रीतिथिति, परम्परा आदि सीकेगु, उकियात ल्यंकेगु व पुस्तान्तरण नं यायेगु अभियान जूगु जानकारी बियादिल ।
वइगु चैत ८ गते पोखराया सभागृहय् जुइगु मिस नेवाः पोखराया अन्तिम प्रतिस्पर्धाय् छनोट जूपिंत कन्हसंनिसें तालिम बीगु शुरु जुइगु ग्वसाः खलकं जानकारी बिउगु दु । कासाय् उपाधि विजेतां पीद्वः, फस्ट रनरअपं नीन्याद्वः व सेकेन्ड रनरअपं ंिझंन्याद्वः तका लिसें दसिपौलिसें थीथी उपहार प्राप्त याइ ।

अथे हे बेस्ट नेपालभाषा, ट्यालेन्ट, बेस्ट पर्सनालिटी, भ्युअर्स च्वाइस, फोटोजेनिक लगायत थीथी विधाय् उत्कृष्ट जुइत सफल जूपिंत नं नगद व दसिपौ बीगु ग्वसाः खलकं धाःगु दु ।