लानिपुखू दयेकेत निगू कम्पनीया आवेदन

येँ – ताः ई विवाद जुयाः दयेके ज्या थाति लानाच्वंगु लानिपुखू पुनर्निर्माणया निंतिं निगू कम्पनी दथुइ प्रतिस्पर्धा जुइगु जूगु दु । येँ महानगरपालिकां अनलाइनपाखें आह्वान याःगु आवेदनय् निगू कम्पनीं लानिपुखू दयेकेगु इच्छा प्वंकूगु खः । थुकिया निंतिं रविना कन्स्ट्रक्सन व वल्र्ड वाइड सुनकोशी कँडेलं आवेदन बिउगु खः ।

निगुलिं कम्पनीया प्रस्तावयात कयाः मूल्यांकन जुयाच्वंगु खँ मनपां धाःगु दु । मूल्यांकन यायेगु ज्याय् छुं ई काइगु खनेदु । छनोट जूगु कम्पनीं बालगोपालेश्वर देगः बाहेक पुखू व उगु लागाय् हरियाली दयेकेगु ज्या याइ । १५ करोड तका बजेट फ्यानातःगु थ्व आयोजना आकिवं असार दुने क्वचायेकेगु कथं तयारी जुयाच्वंगु दु ।

ताः ई तक विवादय् लायेधुंकूगु लानिपुखूया देगः नं गुगु शैलीं दयेकेगु धइगु बारे विवाद जुयाच्वंगु दु । लानिपुखू दयेकेगु खँय् विवाद वयेवं वंगु पुस १३ गते पुरातत्व विभागया पुलांम्ह महानिर्देशक बिष्णुराज कार्कीया संयोजकत्वय् झिंछम्ह दुजः दुगु विज्ञ समूह दयेकूगु खःसा विज्ञ पुचलं लानिपुखूया बालगोपालेश्वर देगः प्रताप मल्लकालीन ग्रन्थकुट शैलीं दयेकेमाः धकाः सुझाव बिउगु खःसा पुरातत्वं उकियात अस्वीकार यानाच्वंगु दु ।

सम्बन्धित बुखँ

LEAVE YOUR COMMENTS