महाकालीइ अप्पां कयेकाः ल्वापु
येँ (नेपालभाषा टाइम्स)-वंगु छुं न्हि न्ह्यवंनिसें भारतीय पक्षलिसे तनावग्रस्त जुयाच्वंगु पश्चिम नेपाःया दार्चुलाय् म्हिगः महाकाली खुसिया सीमा वारी व सीमा पारी अप्पां कयेकाः ल्वापु जूगु दु ।
भारतं महाकाली खुसिया थःगु सिमानाय् यकःति ढंगं तटबन्ध दयेकेगु शुरु यायेवं नेपाःलिसे तनाव शुरु जूगु खः । थ्वहे झ्वलय् ल्वापु तच्वया वनाः थौं निगू देय्या नागरिकतय् दथुइ अप्पां कयेकाः ल्वापु जूगु खः ।
नेपाःया स्थानीय मनूतय्सं दार्चुलाय् च्वनाः भारतया धार्चुलापाखे अप्पां कयेकाछ्वःगु खःसा उखे धार्चुलापाखें नं भारतीय नागरिकतय्सं नेपाःपाखे अप्पां कयेका हःगु खः । उकी लानाः प्यम्ह नेपाःमि घाःपाः जूगु दु । निगू पक्ष दथुइ अप्पां कयेकाः ल्वापु जुइवं नेपाः–भारत स्वाइगु महाकाली खुसिया ताँ बन्द याना बिउगु खः ।
नेपाःलिसे छुं हे सल्लाह मयासे भारतं यकःति ढंगं तटबन्ध दयेकेवं उगु लागाय् छुं ई न्ह्वंनिसें हे तनाव ब्वलनाच्वंगु खः । भारतं थःथाय् तटबन्द दयेकेवं नेपाःपाखें उकी आपत्ति क्यंगु खः । भारतं थःगु भूमिइ जक यकःति ढंगं तटबन्द दयेकल धाःसा उकिं यानाः खुसिया धार हिलाः नेपाःपाखे खुसिबाः वइगु सम्भावना दु । थुकिं यानाः दार्चुलाया सदरमुकाम खलंगाय् तकं खतरा ब्वलंगु खँ धाःगु दु । नेपालं थुकियाबारे भारतयात इलय् ब्यलय् सतर्क यानाच्वंगु खःसां भारतं धाःसा उकियात वास्ता यानाच्वंगु मदु ।
भारतं अथे यकःति रुपं तटबन्द दयेकाच्वंसां नेपाःया प्रशासनं धाःसा वास्ता मयाःगु द्वपं नं नेपाःया नागरिकतय्सं बियाच्वंगु दु । न्हापा न्हापा भारतं नेपाःयाके न्यँ हे मन्यँसे तटबन्द दयेकीगु खःसां थुगुसी धाःसा नेपाःयात जानकारी बियाः ज्या शुरु याःगु खँ धाःगु दु ।
थःगु लागाय् तटबन्ध दयेकेगु झ्वलय् भारतया ठेकेदारतय्सं वंगु वालय् नेपाःया सीमापाखे च्वंगु ल्वहं समेत ल्ह्ययेगु शुरु यायेवं नेपाःया स्थानीय मनूतय्सं आपत्ति प्वंकूगु खः । नेपाःपाखेया ल्वहं नं ल्ह्ययेगु ज्या न्ह्याकूगु खँयात कयाः नं नेपाः व भारतया सीमा वारी–पारी च्वंपिं स्थानीय मनूतय् दथुइ ल्वापु जूगु दु । तर थःगु देशया ल्वहं ल्ह्ययाच्वनं नं नेपाःया प्रशासनं धाःसा प्रतिरोध मयाःगु खँ धाःगु दु ।
LEAVE YOUR COMMENTS