नेवाः नखः न्यूयोर्कया दँमुँज्या व न्हूधाः

येँ -अमेरिकाया न्यूयोर्क शहरय् च्वनाच्वंपिं नेवाःतय्गु संस्था नेवाः नखः न्यूयोर्कया प्यक्वःगु दँमुँज्या व न्हूगु ज्यासना पुचःया ल्यज्या वंगु थिंलाथ्व यःमरि पुन्हिकुन्हु जुल ।

संस्थाया नायः विष्णुमान प्रधानया सभापतित्वय् न्ह्याःगु ज्याझ्वलय् मूपाहांकथं संस्थापक नायः वीरेन्द्र प्रधानं ब्वति कयादीगु खः । पुलांम्ह सल्लाकारलिसें दुजः अजयमान छोचुंया लुमन्तिइ छगू मिनेट मौन धारण यानाः न्ह्याःगु ज्याझ्वलय् न्वकु महेन्द्रवीर वज्राचार्यं लसकुस यानादीगु खः ।

दँमुँज्याया बन्द सत्रय् मूछ्याञ्जे डा. नरेशमान शाक्यं संस्था प्रगति विवरणलिसें संस्थापाखें ग्वसाः ग्वःगु थीथी ज्याझ्वःया संकिपा व किपा नं न्ह्यब्वयादीगु खःसा नायः प्रधानलिसें लिउ दांभरिं सलोनी वन्त श्रेष्ठं ल्याःचाः न्ह्यब्वयादीगु खः ।

ज्याझ्वलय् संस्थापक नायः प्रधान, संस्थापक छ्याञ्जे संजय शिलाकार, सल्लाकार राजकुमार श्रेष्ठ लगायत थीथी व्यक्तित्वपिंसं भिंतुना न्वचु तयादीगु खः । बन्द सत्र लिपा संस्थाया न्हूगु ज्यासना पुचःया नं ल्यज्या याःगु खः । ल्यज्याकथं न्हूगु ज्यासना पुचलय् महेन्द्रवीर वज्राचार्य नायः, डा. नरेशमान शाक्य न्हापांम्ह न्वकु, श्रुति अमात्य निम्हम्ह न्वकु, तुलसीनारायण चित्रकार मूछ्याञ्जे, संगीता मुखिया छोचुं छ्याञ्जे, सलोनी वन्त श्रेष्ठ दांभरिं, मेनी श्रेष्ठ लिउ दांभरिंकथं ल्यःगु दु ।

अथे हे मूदुजलय् नम्रता प्रधान, दिपककुमार प्रधान, महेन्द्रकुमार वज्राचार्य, संजय प्रधान, राधिका श्रेष्ठ, अभिषेक छोचुं व शोभना शाक्ययात सर्वसम्मतिं ल्यःगु दु । न्हूगु ज्यासना पुचः ल्ययेत संस्थापक नायः प्रधानया संयोजकत्वय् निर्वाचन समिति गठन याःगु खः।
थुकथं हे सल्लाहकारय् संस्थाया विधानकथं निवर्तमान नायः विष्णुमान प्रधानयात ल्यःगु दुसा वय्कलं न्हूगु ज्यासना पुचःया कार्यकाल सफलताया कामना यासे भिंतुना नं बियादीगु खः ।

सन् २०११ य् नीस्वंगु संस्थापाखें नेवाः परम्परा, कला, संस्कृतिया च्वन्ह्याकेगु ज्या याना वयाच्वंगु दु । संस्थापाखें मंकाः म्हपुजा, यःमरि पुन्हि, गुंपुन्हि, यँयाःपुन्हिया लसताय् नं थीथी ज्याझ्वः याना वयाच्वंगु दुसा न्हूदँया लसताय् नगुमा नं पिथना वयाच्वंगु दु ।