
येँ (नेपालभाषा टाइम्स)÷ नुवाकोटया ककनी गाउँपालिका व धादिङया धुनबेसी नगरपालिकाया स्थानीय वासिन्दां म्हिगःनिसें सिसडोलय् फोहोर वायेगु ज्या पनाबिउगु दु । येँ नं फोहोर ज्वना वंगु गाडीयात स्थानीय वासिन्दां पना बीवं स्वनिगलय् हाकनं फोहोरया समस्या ब्वलनीगु सम्भावना अप्वया वंगु दु ।
ककनी गाउँपालिकाया अध्यक्ष सुमन तामाङं फोहोर पनेगु ज्या स्थानीय जनतां स्वतःस्फुर्त याःगु खः धासें केन्द्र सरकारं वेवास्ता यानाच्वंगुलिं स्थानीय वासिन्दा बाध्य जुयाः फोहोर पंगु खँ कनादिल । दछि न्ह्यः जूगु सम्झौता सरकार व स्वनिगःया झिंच्यागू नगरपालिकां पालना मयाःगुलिं फोहोर पनेत थःपिं बाध्य जूगु खँ वय्कलं ‘नेपालभाषा टाइम्स’यात कनादिल ।
वय्कलं धयादिल, ‘फोहोरया समस्या आः जक मखु न्हापांनिसें खः । स्थानीय जनतां आन्दोलन यात कि सरकारं थीथी सम्झौता याइ तर कार्यान्वयन यायेगुली धाःसा चिउताः मक्यं ।’
वय्कलं कनादी कथं २०७९ जेठ २६ गते सहरी विकास मन्त्रालय व स्थानीय वासिन्दाया दथुइ जूगु सहमतियात सरकारं कार्यान्वयन मयाःगुलिं थ्व आन्दोलन यायेमाःगु अवस्था वःगु खः । स्वनिगःया थीथी नगरपालिकां यंकीगु फोहोर वर्गीकरण मयासे लाथेपाथे वांछ्वयेगु ज्यां फोहोर नवःगु जक मखु मनू हे च्वने मजीक भुजिं वयाः दुःख बिउगुलिं उपिं आन्दोलनय् कुहां वयेमाःगु खः ।
केन्द्र सरकार व स्थानीय वासिन्दा दथुइ व्यवस्थित रुपं फोहोर व्यवस्थापन यायेगु, पीडित स्थानीय जनतायात अनं मेथाय् स्थानान्तरण यायेगु व पीडित स्थानीय जनताया जग्गा अधिग्रहण यायेगु सम्झौता जूगु खःसा निगुलिं ज्या सरकार व स्वनिगःया नगरपालिकातय्सं मयाःगु खँ नं अध्यक्ष तामाङं कनादिल । वय्कलं धयादिल, ‘फोहोर व मनू छथाय् च्वनेफइगु अवस्था मदु । फोहोरया कारणं स्थानीय जनता थीथी ल्वय्या शिकार जुयाच्वंगु दु । उकिं सरकार लिसे जूगु सम्झौता कथं सरकारं जनताया समस्या समाधान यायेमाः ।’
सिसडोलय् फोहोर वाके मबिउगु खँय् येँ महानगरपालिका १७ वडाया वडाध्यक्ष लिसें मनपया प्रवक्ता नविन मानन्धरं नं सरकारया कारणं हे सिसडोलया वासिन्दां फोहोर वाके मबिउगु द्वपं बियादीगु दु ।
वय्कःया कथं सरकार व स्थानीय वासिन्दा दथुइ जूगु सहमति कार्यान्वयन मयायेवं असन्तुष्टि प्वंकेगु झ्वलय् फोहोर वायेगु ज्याय् पंगः थंगु खः ।
आः छवाः तक येँया फोहोर टेकुइ व्यवस्थापन याये फइगु सम्भावना दुसां वयां लिपा धाःसा समस्या वयेफइगु खँ नं वय्कलं कनादिल ।
‘नेपालभाषा टाइम्स’लिसे खँ ल्हासें वय्कलं धयादिल, ‘टेकुइ प्यन्हु तक फोहोर मुंके फइगु सम्भावना दु । छन्हु निन्हु स्थानीय जनताया छेँय् फोहोर व्यवस्थापन जुइ । वयां लिपा व्यवस्थापन यायेत समस्या जुइफु । अथेजूसां नं थ्व छवाःया दुने छुं न छुं निकास लुइगु सम्भावना दु ।’
सिसडोलया स्थानीय वासिन्दां धयाच्वंगु समस्याया बारे जिज्ञासा तयाबलय् वय्कलं धयादिल, ‘केन्द्र सरकार व स्थानीय वासिन्दाया दथुइ सम्झौता जूगु खः । सम्झौता कार्यान्वयन यायेगु दायित्व सरकारया खः । स्थानीय तहं न त जग्गा अधिग्रहण यायेफइ, न त सिसडोलया वासिन्दायात स्थानान्तरण यायेफइ । उकिं आः ला तप्यंक हे सरकार न्ह्यःने वयाः समस्या समाधान यायेमाः । मनपां जक छुं याये फइगु अवस्था मदु ।’
LEAVE YOUR COMMENTS