लुम्बिनीइ न्हापांखुसी त्रिपिटक वाचन

येँ – बुद्ध जन्मभूमि लुम्बिनीइ न्हापांखुसी स्वन्हुयंकंया अन्तर्राष्ट्रिय त्रिपिटक वाचन शुरु जूगु दु । नेपालय् न्हापांखुसी जूगु त्रिपिटक वाचन ज्याझ्वः अखिल नेपाल भिक्षु महासंघ, लुम्बिनी विकास कोष व लुम्बिनीस्थित थाई राजकीय विहारया मंकाः ग्वसालय् जूगु खः ।

त्रिपिटक वाचन ज्याझ्वःया उलेज्या भिक्षु महासंघया नायः भिक्षु मैत्री, नेपाःया निंतिं थाइल्याण्डया राजदूत भगवत तान्सकुल, कोषया उपाध्यक्ष भिक्षु मैत्तेय, प्रदेशसभा सदस्य फकरुद्दिन खान लगायतं यानादीगु खः ।थाइ राजदूत तान्सकुलं विश्वय् बुद्धया दर्शन न्यंकेत थज्याःगु ज्याझ्वलं महत्वपूर्ण भूमिका म्हितीगु विश्वास प्वंकादिसें भगवान बुद्धया जन्मभूमिइ पलाः तये खनीगु थाइ नागरिकतय् निंतिं तसकं तःधंगु सौभाग्य व लसता खः धयादिल ।

लुम्बिनीइ जूगु थुकथंया ज्याझ्वः समग्र बौद्धमार्गीतय् निंतिं हे महत्वपूर्ण जूगु वय्कलं धयादिल । कोषया उपाध्यक्ष भिक्षु मैत्तेयं बुद्ध शासनया विस्तार व विकासया निंतिं थुकथंया ज्याझ्वःयात निरन्तरता बिया वनेमाःगु खँय् बः बियाबिज्यासें बुद्ध शिक्षा व दर्शनया विस्तारया निंतिं सकल उपासक उपासिकापिंसं लगे जुइमाःगु व सकसिनं ग्वाहालि यायेमाः धयाबिज्यात ।

लिसें वसपोलं भिक्षुपिनिगु कुतः व बौद्ध परियत्ति शिक्षाया कारणं नेपालय् बुद्ध शिक्षा व बौद्ध धर्म च्वन्ह्याना वनाच्वंगु नं धयाबिज्यात ।
भिक्षु महासंघया नायः भिक्षु मैत्रीं थुकथंया त्रिपिटक वाचन ज्याझ्वलय् विश्वन्यंकं न्यनाच्वंपिं बौद्ध धर्मावलम्बि व बौद्धमार्गीतय्त बुद्ध जन्मस्थल लुम्बिनी वयेत प्रेरित याइ धयाबिज्यात ।

प्रदेशसभा सदस्य फकरुद्दिन खानं त्रिपिटक वाचन ज्याझ्वलं लुम्बिनीयात अझ च्वन्ह्याकेत ग्वाहालि जूवंगु विचाः तयादिल ।
भिक्षु बोधिसेनं पंचशील बियाबिज्याःगु खः । बौद्ध धर्मया मुख्य ग्रन्थ त्रिपिटक वाचन यायेगु झ्वलय् थ्व अन्तर्गतया विनय पिटक, सुत्त पिटक व अभिधम्म पिटक वाचन जुइ ।

त्रिपिटक ग्रन्थ मूलत पाली भासं च्वयातःगु खःसां थीथी भासं अनुवाद जूगु दु । स्वन्हुयंकं जुइगु त्रिपिटक वाचन पाली भासं जुइगु अखिल नेपाल भिक्षु महासंघया महासचिव भिक्षु कोन्डण्यं ‘नेपालभाषा टाइम्स’यात कनाबिज्याःगु दु । त्रिपिटक वाचनया निंतिं थीथी देशं वःपिं बौद्ध भिक्षु, भिक्षुणी, लामा गुरु, आनी, उपासक उपासिकापिं सकसितं च्वनेगु, नयेगु व वयेवनेया निंतिं माःगु बन्दोबस्त कोषं याःगु नं वसपोलं जानकारी बियाबिज्याःगु दु ।

ज्याझ्वः स्वयां न्ह्यः लुम्बिनीस्थित शान्ति दीपनिसें मायादेवी देगः परिसरतक छगू शान्ति ¥याली पिदंगु खः । न्हापांगु न्हिया त्रिपिटक वाचन थाइ भिक्षुपिनिगु नेतृत्वय् व अनं लिपा नेपाःया भिक्षुपिनिगु नेतृत्वय् जूगु खः ।

म्हिगः हे बर्मा, श्रीलंका व कम्बोडियाया भिक्षुपिनिगु नेतृत्वय् वाचन यायेगु ज्या जूगु खःसा थौं निन्हुया न्हिया सत्रया नेतृत्व महायानी, चिनिया, जापानी भिक्षुपिंसं याइगु व कन्हय् हाकनं थाइ भिक्षुपिनिगु नेतृत्वय् वाचन जुइ । स्वन्हुया दिंया वाचन ज्याझ्वः लिपा मायादेवी परिसरय् छगू पदयात्रालिसें दीप प्रज्वलन यानाः ज्याझ्वः क्वचाइगु महासंघं जानकारी बिउगु दु ।