क्वन्तिया ठेकेदार बिसिउँ वन

यल – थनया क्वन्ति महाद्यःया देगः दयेकेगु ज्याया ठेक्का काःम्ह ठेकदार बिसिउँ वनाः देगः दनेगु ज्या ठप्प जूगु दु । देगः दनेगु सम्झौताया ई क्वचायेधुंकूसां दयेकेगु ज्या धाःसा अझं क्वमचाःनि । यल स्मारक व दरबार हेरचाह ज्याकू प्रमुख काजीमान प्याकुरेलं कनादी कथं आः दथुइ ज्या दिकाः ठेकेदार सम्पर्कय् तकं मवःगुलिं समस्या जुयाच्वंगु दु ।

देगः दयेकेगु सम्झौता असारय् क्वचाःगु खःसां थीथी समस्या क्यंगुलिं दछिया ई थपे यानाः बिउगु खः । यदि मेगु दछि ज्या यात धाःसा देगः दने क्वचाइगु खनेदु ।
पुनर्निर्माणया झ्वलय् देगः ग्वतँजाः दयेकेगु धइगु विवाद व सुरक्षा प्रबन्धया कारणं ताः ई तक ज्या दिउगु खः ।

देगःया फुक्कं भाग दयेकेम्वाःगु व माःगु थासय् जक मर्मत याःसा गाः धइगु विज्ञतय् सल्लाह कथं ज्या जुयाच्वंगु खँ भाजु प्याकुरेलं कनादिल । देगः पुनर्निर्माण झ्वलय् अनया महत्वपूर्ण सामानया सुरक्षा बारे स्थानीय वासिन्दां चिउताः प्वंकूगुलिं प्रहरीं नियमित गस्ती यायेगु सहमति लिपा ज्या न्ह्याःगु खः ।