सरकारी स्कूलय् अनलाइन कक्षाया समस्या

येँ -कोरोना महामारीया कारणं थुगु दँया शैक्षिक सत्र नं प्रभावित जूगु दु । शिक्षा मन्त्रालयपाखें आःयात अनलाइन विधिं हे कक्षा सञ्चालन यायेगु निर्देशन सकलें स्कूलतय्त बीधुंकूगु दु । तर सरकारी स्कूलय् धाःसा अनलाइन कक्षा सञ्चालन यायेत थाकुयाच्वंगु खँ सीदुगु दु ।

खास यानाः सरकारी स्कूलय् ब्वनीपिं अधिकांश विद्यार्थीत न्यून आय दुपिं मनूतय् मस्त जुइगु कारणं उमिके अनलाइन कक्षा कायेत माःगु मोबाइल वा ल्यापटब मदइगु जुयाः कक्षा कायेत थाकुयाच्वंगु खँ धाःगु दु । गुलिखे अभिभावकतय् निम्ह स्वम्ह मस्त नं दइगु जुयाः म्हतिं म्हतिं उपकरण न्याना बीगु सम्भावना नं मदयाच्वंगु खँ धाःगु दु । गुलिखे थासय् धाःसा नेटया लाइन तकं हे मदइगु जुयाः अनलाइन कक्षाय् दुहां वयेत तकं समस्या जुयाच्वंगु खँ नं धाःगु दु ।

थौंकन्हय् न्हूगु शैक्षिक सत्र असारंनिसें शुरु जुइधुंकूगु दु । तर प्राविधिक कारणं यानाः आपालं सरकारी स्कूलय् कक्षा ४ निसेंया कक्षा जक सञ्चालन जुयाच्वंगु दुसा १ निसें ३ तकया कक्षा सञ्चालन यायेत तकं थाकुयाच्वंगु खँ नं धाःगु दु । थुकिं यानाः १ निसें ३ तकया कक्षा गय् यानाः सञ्चालन यायेगु धइगु हे समस्या पिहां वयाच्वंगु खँ सीदुगु दु । थ्व समस्या गय् यानाः समाधान यायेगु धइगु नं समस्या जुयाच्वंगु खँ धाःगु दु ।