प्रदेशया सम्पर्क ज्याकू येँय् तयेमाः

येँ – न्हय्गुलिं प्रदेश सरकारया सम्पर्क ज्याकू संघया राजधानी येँय् तयेमाःगु सुझाव वःगु दु । प्रदेश सरकारया समस्या बारे बुझे यायेत सरकारं नीस्वंगु समितिं संघ व प्रदेश सरकार दथुइ समन्वय यायेगु निंतिं येँय् प्रदेश सरकारया ज्याकू तयेत सुझाव बिउगु खँ समितिया दुजः लिसें प्रधानमन्त्री व मन्त्रिपरिषद् ज्याकु सचिव केदार अधिकारीं कनादिल ।

वय्कलं धयादी, ‘संघीय व प्रदेश सरकार दथुइ समन्वयया आवश्यकता दु, निगुलिं सरकारया समन्वय यायेगु निंतिं संघय् फुक्कं प्रदेश सरकारया सम्पर्क ज्याकू थापना यायेमाः ।’सरकारं प्रधानमन्त्री ज्याकूया सचिव अधिकारी, लक्ष्मण मैनाली व लालशंकर घिमिरे दुथ्याःगु समितिपाखें प्रदेशया समस्या बारे अध्ययन समिति गठन याःगु खः ।

अथेहे समितिं प्रदेश सरकारयात माःगु कर्मचारी, कानुन व भौतिक पूर्वाधार म्हो जूगु खँ नं प्रतिवेदनय् न्ह्यथंगु दु । प्रदेश सरकार सञ्चालन यायेत थाकुयाच्वंगु खँ न्ह्यथँसें समितिं गुलिखे प्रदेश मन्त्रालयया नां पुनःसंरचना यायेमाःगु सुझाव नं बिउगु दु । प्रदेशया भूगोल कथं मन्त्रालयया नां मदुगुलिं पुनःसंरचना यायेमाःगु खँ सचिव अधिकारीं कनादिल । समितिं मुख्यसचिव लोकदर्शन रेग्मीयात प्रतिवेदन लःल्हायेधुंकूगु दु ।