बुद्धिष्ट फोरम अन्तर्राष्ट्रिय सम्मेलनय् सहभागि प्रतिनिधिमण्डल लिहां वल

येँ – चीनया फुजियान प्रान्त अन्तर्गतया पुथियाँ सहरय् जूगु न्याक्वःगु वल्र्ड बुद्धिष्ट फोरमया अन्तर्राष्ट्रिय सम्मेलनय् ब्वति कयाः धर्मोदय सभाया बौद्ध प्रतिनिधिमण्डल नेपाः लिहां वःगु दु । धर्मोदय सभाया उपाध्यक्ष लक्ष्मीदास मानन्धरया नेतृत्वय् सम्मेलनय् ब्वति कायेत स्वम्हेसिया नेपाली प्रतिनिधिमण्डल उखेपाखे वंगु खः ।

वंगु अक्टोबर २८ निसें ३० तक स्वन्हुयंकं जूगु सम्मेलनय् विश्वया सछिगू स्वयां अप्वः देय्या प्रतिनिधिमण्डलं ब्वति काःगु खः । श्रीलंका, म्यान्मा थेंज्याःगु बौद्ध राष्ट्रपाखें उच्चस्तरीय प्रतिनिधिमण्डलं ब्वति काःगु सम्मेलनय् सहभागि राष्ट्रं भिंतुना सन्देश नं बिउगु खः ।

विश्वया आपालं देय्या राष्ट्र प्रमुख व सरकार प्रमुखपाखें भिंतुना सन्देश बीगु ज्या जूसां बुद्ध जन्मभूमि नेपाःया राष्ट्र प्रमुखपाखें सम्मेलनय् शुभ कामना मबिउगुलिं सम्मेलनय् सहभागि नेपाःया प्रतिनिधिमण्डलं खायुगु अनुभूति याःगु दु ।

राष्ट्रपतिया ज्याकुथिइ बुद्ध, बौद्ध धर्म प्रति माया व सद्भाव तइपिं मदुतले नेपाःमितय्सं अन्तर्राष्ट्रिय मंचय् थुकथं हे नेपाःया बेइज्जत जूगु सह यायेत बाध्य जुयाच्वनीगु नेपाली प्रतिनिधिमण्डलं धाःगु दु ।

सम्मेलनया उलेज्याझ्वःया छन्हु लिपा नेपाली प्रतिनिधि मण्डलया नेतृत्व यानादीम्ह धर्मोदय सभाया वरिष्ठ उपाध्यक्ष लक्ष्मीदास मानन्धरं संबोधन यानादीगु खःसा महासचिव सागरमान वज्राचार्यं ‘प्राक्टिसिंग लभिंग काइन्डनेस एण्ड कम्पासिंग इन बिल्डिंग अ कम्युनिटि अफ सेयर्ड फ्युचर’ विषयया ज्यापौ न्ह्यब्वयादीगु खः ।

द बुद्धिष्ट एशोसियसन अफ चीन व चाइना रिलिजियस कल्चर कम्युनिकेशन एशोसियसनया ग्वसालय् जूगु अन्तर्राष्ट्रिय सम्मेलनय् नेपाली बौद्ध प्रतिनिधिमण्डलयात उच्चस्तरीय सम्मान नं बिउगु खः ।

सम्बन्धित बुखँ

LEAVE YOUR COMMENTS