बाँसबारी छाला जुत्ताया झिगू रोपनी जग्गा सरकारया नामय् लिहां वल
येँ (नेपालभाषा टाइम्स)- चाँदबाग स्कूल चले यानाच्वंगु बाँसबारी छाला जुत्ता कारखानाया झिगू रोपनी जग्गा सरकारया नामय् वःगु दु । डिल्लीबजार मालपोत कार्यालयं म्हिगः साउन ९ गतेया मितिं उगु जग्गा सरकारया नामय् हःगु खः । साविक २२, आःया कित्ता नं. ४२०, ४२९ या जग्गा हालसाविक यानाः सरकारया नामय् हःगु खः । येँ महानगरपालिका ३ वडाया पत्र कथं जग्गायात सरकारया नामय् हःगु खः ।
बाँसबारी छाला जुत्ता कारखानाया नामय् दुगु उगु जग्गा हिनामिना याःगु द्वपनय् चौधरी गु्रपया अरुण चौधरीलिसें स्वम्हेसित ज्वंगु खः ।
बाँसबारी छाला जुत्ता उद्योग संचालनया निंतिं तत्कालिन श्री ५ या सरकारं १८ रोपनी ३ आना २ पैसा जग्गा उद्योगयात बिउगु खः । थुकी मध्ये १० रोपनी जग्गा बाँसबारी छाला जुत्ता कारखानाया तत्कालिन अध्यक्ष अजितनारायण सिंह थापा व चौधरी परिवार दथुइ वि.सं. २०४३ भदौ १३ गते जूगु सहमति कथं चौधरी परिवारया बहुमत शेयर दुगु कम्पनी च्याम्पियन्स फुटवेयर यात बिउगु खः । थापा अध्यक्ष जुयाच्वंगु इलय् स्पोर्टस लाकां दयेकेगु धकाः चौधरी परिवारया साझेदारीइ बाँसबारी छाला जुत्ता कारखानाया नं शेयर तयाः च्याम्पियन्स फुटवेयर कम्पनी दयेकूगु खः । थुकीया निंतिं अरुण चौधरीया अबु लुनकरणदास चौधरी व बाँसबारी छाला जुत्ता कम्पनी दथुइ छगू सम्झौता जूगु खः ।
कम्पनीया ५१ प्रतिशत शेयर चौधरी परिवारयागु, २५ प्रतिशत शेयर बाँसबारी छाला जुत्ता कारखानायागु व २४ प्रतिशत शेयर सर्वसाधारणया निंतिं छुटे यायेगु कथं सम्झौता जूगु खः । थ्व सम्झौता कथं बाँसबारीं थःगु शेयर २५ लाख तका बराबरया झिगू रोपनी जग्गा च्याम्पियन्स फुटवेयर कम्पनीइ तल, अले थुकिया उत्पादनया प्रचार प्रसार यायेगु धकाः थप छगू लाख तका दां नं बिल । २०४३ सालय् बाँसबारीं न्हापां खुगू रोपनी व लिपा प्यंगू रोपनी यानाः झिगू रोपनी जग्गा च्याम्पियन्स फुटवेयर कम्पनीइ यंकूगु खः . लिपा चौधरी परिवारं कम्पनीयात हे डुबे यायेगु खेल म्हिताः कम्पनी हे बन्द यानाबिउगु खःसा जग्गा जक थःपिनिगु नामय् याःगु खः । थुगु जग्गाय् अरुण चौधरीं चाँदबाग स्कूल चायेकातःगु खः
LEAVE YOUR COMMENTS