खर्च यायेमफयाः निगूत्या अर्ब ध्यबा संचित

येँ – बैकिङ क्षेत्रय् ध्यबाया अभाव जुयाः त्यासा प्रवाह याये मफयाच्वंगु इलय् सरकारी ढुकुटीइ धाःसा २ अर्ब ५२ अर्ब तक संचित जुयाच्वंगु दु। बैंकं बुधवाः सार्वजनिक याःगु अपरिष्कृत वित्तिय विवरणय् उगु ध्यबा सरकारी ढुकुटी लानाच्वंगु न्ह्यथनातःगु खः। सरकारं पुँजीगत खर्च यायेमफयाः थुकथं सरकारी ढुकुटी ध्यबा थानाच्वंगु खः।

राष्ट्र बैंकया कथं मंगलवाः तक पुँजीगत खर्च ५१ प्रतिशत जक जूगु दु। चालु आर्थिक दँया ३ अर्ब तक खर्च यायेगु लक्ष्य तयातःगु खःसा असार १२ गते तक १ खर्ब ७२ अर्ब ८९ करोड तका खर्च जूगु महालेखा नियन्त्रणया ज्याकुथिं धाःगु दु। आर्थिक दँ क्वचायेत निवाः जक ल्यं दनिगु इलय् सरकारी खर्च बछि जक खर्च जूगु दु।

मेखे राष्ट्र बैंकं वंगु जेठं ४ अर्ब ६९ अर्ब ७० करोड तकाया थीथी दरया नोट निष्काशन याःगु दु। केन्द्रीय बैंकं निष्काशन याःगु मध्ये ४ खर्ब ६० अर्ब ८६ करोड तका चलन चल्तिइ दु। ८ अर्ब ८७ करोड ८६ लाख ध्यबा बैंकय् मौज्दात दुगु खँ राष्ट्र बैंकं धाःगु दु। राष्ट्र बैंकं लुँ, विदेशी मुद्रा व ऋणपत्र बरः तयाः नोट निष्काशन याइ।

केन्द्रीय बैंकया कथं आः तक लुँ व वह जक बरः तयाः नोट निष्काशन यायेगु यानाच्वंगु दु।सरकारं नोट छापे यायेगु ज्याय् यक्व ध्यबा खर्च जूगु धासें नोटया प्रयोग यायेगु ज्या म्हो याना यंकेगु कथं नीति दयेकाः लागू याःगु दु। सरकारं वंगु साउन निसें १० लाख स्वयां अप्वः ध्यबा एकाउन्टपेयी चेकं भुक्तानी यायेमाःगु व्यवस्था लागू याःगु खः।