युइएफए नेसन्स कप स्पेनं क्रोएसियायात खुगू गोलं बुकल

युरोपियन फुटबल एशोसियसन (युइएफए)या न्हूगु धेंधेंबल्ला युइएफए नेसन्स लिगय् स्पेनं विश्वकप फुटबल२०१८ या उपविजेता क्रोएसियायात तःधंगु अन्तर बुकूगु दु । लिग ‘ए ’अन्तर्गत समुह चरणया कासाय् स्पेनं क्रोएसियायात ६—० गोलं बुकूगु खः। स्पेनया निंति साउल निगुएज, मार्को एसेन्सिओ, रोड्रिगो, सर्जियो रामोस व इस्कों छगू छगू जक गोल याःगु खःसा छगू गोल आत्मघाती जूगु खः।

कासाया २४औं मिनेटय् साउल निगुएजया गोलं स्पेनं अग्रता काःगु खः । मार्को एसेन्सिओं ३३ औं मिनेटय् गोल याःगु खःसा निगू मिनेट लिपा हे क्रोएसिया गोलकिपर लभरेन कालिनिकं आत्मघाती गोल यागु खः। कासाया निगुगू हाफया ४८ औं मिनेटय् रोड्रिगो, ५७ औं मिनेटय् रामोस व ७० औं मिनेटय् इस्कों गोल याःगु खः ।

स्पेन झ्वलाक्क निगू कासा त्याकाः ६ अकं सहित समुह ‘ ए ४’ या शीर्ष थासय् दु । थ्व समूहय् दुगु इंग्ल्याण्ड व क्रोएसिया अकंविहिन तिनि । न्हापांगु कासाय् स्पेनं इंग्ल्याण्डयात १–० गोलं बुकूगु खः ।

अथेहे नेसन्स लिगया लिग ए अन्तर्गत समुह ‘ए २’पाखे बेल्जियमं आइसल्याण्डयात ३–० गोलं बुकल । बेल्जियमया निंतिं रोमेलु लुकाकुं निगू व इडेन हर्जाड छगू गोल याःगु खः । न्हापांगु हाफय् निगू गोलं अग्रता काःगु बेल्जियम निगूगु हाफय् थप छगू गोल याःगु खः । थ्व समूहय् स्वीजरल्याण्ड शीर्ष थासय् दु ।