प्रदेशया बिदा संघं पालना मयाः

येँ – प्रदेश सरकारं घोषणा याःगु सार्वजनिक विदायात प्रदेशय् दुगु थीथी कार्यालयतय्सं अवज्ञा याःगु धासें प्रदेश २ या आन्तरिक मामिला लिसें कानुनमन्त्री ज्ञानेन्द्र यादवं नेपाल राष्ट्र बैंक जनकपुरधाम ज्याकुथी धर्ना बिउगु दु । थ्व स्वयां न्ह्यः वंगु गुंपुन्हि कुन्हु नं प्रदेश सरकारं घोषणा याःगु सार्वजनिक विदाया अवज्ञा यात धासें राष्ट्र बैंक ज्याकुथी मन्त्री यादवं तालं ग्वया बिउगु खः ।

म्हिगः कृष्ण जन्माष्टमि कुन्हु नं प्रदेश सरकारं थःगु प्रदेशय् सार्वजनिक विदाया घोषणा याःगु खःसा राष्ट्र बैंक, जिल्ला प्रशासन कार्यालय व अदालत लगायतया सरकारी कार्यालय चायेकूगु खः । धर्ना च्वनेगु झ्वलय् सञ्चारकर्मीत लिसे खँ ल्हासे मन्त्री यादवं संघीय सरकारं कानुनया उल्लंघन याःगु व देय् संघीयताय् वनेधुंकाः नं सरकारं संघीयता मदयेकेगु षडयन्त्र यानाच्वंगु द्वपं बियादिल ।

थ्वहे दथुइ सरकारया विदा कार्यान्वयन मयाः धासें जनकपुर व सिराहाया छुं नं बैंकय् तालाबन्दीया नापं तोडफोड समेत जूगु दु । बैंकय् तालाबन्दी यानाच्वंपिं संघीय समाजवादी फोरम नेपालया नीम्ह कार्यकर्तातय्त प्रहरीं ज्वंगु जानकारी नं मन्त्री यादवं बियादीगु दु ।