नामांकरण व राजधानीया खँय् संसद अवरुद्ध

येँ – प्रमुख प्रतिपक्षी नेपाल कांग्रेसं प्रदेश नम्बर ३ या प्रदेश सभा बैठक अवरुद्ध याःगु दु । सरकारं राजधानी व प्रदेशया नामाकरण प्रक्रिया मन्ह्याकूतले मेगु प्रक्रिया न्ह्याके बीमखु धासें उमिसं बैठकय् पंगः थनाबिउगु खः । बैठकया शुरुइ सभामुख सानुकुमार श्रेष्ठं अधिवेशन आह्वान सम्बन्धी प्रदेश प्रमुख अनुराधा कोइरालाया पौ ब्वनाः न्यंकूगु खः ।

वयां लिपा प्रदेश सभाय् दुगु दलया प्रतिनिधिं सम्बोधन याःगु खः । सभामुखं नियमित प्रक्रियां संसदयात न्ह्यःने न्ह्याकेत्यंगु झ्वलय् कांग्रेसया सांसदतय्सं पंगः थनाबिउगु खः । कांग्रेस संसदीय दलया नेता इन्द्रबहादुर बानियाँ राजधानी व प्रदेशया नामाकरण प्रक्रिया मन्ह्याकूतले संसद न्ह्याके मबीगु अडान काःगु खः ।

कांग्रेसया पंगः लिपा प्रदेश सभाया बैठक थौं ४ बजे तकया निंतिं स्थगित जूगु दु । वंगु हिउँदे अधिवेशनय् प्रदेशया मुख्यमन्त्री व सभामुख श्रेष्ठं वर्षाया अधिवेशनय् प्रदेशया राजधानी व प्रदेशया नां बारे सहलह यायेगु धाःसां नं अधिवेशनया धलखय् उगु खँ दुमथ्याःगुलिं कांग्रेसया सांसदतय्सं पंगः थंगु खः ।

थ्वहे झ्वलय् ‘नेपालभाषा टाइम्स’ लिसे खँ ल्हासें नेकपाया सांसद बसन्त मानन्धरं राजनीतिक खँ जूगुलिं पार्टीं याकनं प्रदेशया नामाकरण व राजधानी बारे अधिकतम सहमति दयेकेत पहल यायेमाःगु खँ कनादिल । वय्कलं अस्थायी राजधानीया मानसिकतां सरकार लिसें सुयातं फाइदा जुइ मखु धासें फयाफछि फुक्कं पक्षयात कःघानाः निर्णय यायेमाः धयादिल ।

थुकिया लागिं राजनीतिक सहमति माःगु खँय् नं वय्कलं बः बियादिल । प्रदेशया मुख्यमन्त्री डोरमणि पौडेलं धाःसा आः अस्थायी राजधानी दुगु हेटौंडायात हे स्थायी राजधानी दयेकेमाः धकाः अडान कयाच्वंगु दुसा मेखे प्रदेशया ८६ म्ह सांसदतय्सं धाःसा हेटौंडा प्रदेशया राजधानी दयेकेत उचित मजू धासें काभ्रेयात राजधानी दयेकेमाः धकाः अडान कयाच्वंगु दु ।

सम्बन्धित बुखँ

LEAVE YOUR COMMENTS