छवाःयंकंया होमस्टे तालिम क्वचाल
किपू – स्वंगः ल्वहं पुचःया ग्वसालय् भिजिट नेपाल–२०२० यात लक्षित यानाः न्ह्याःगु छवाःयंकंया होमस्टे तालिम क्वचाःगु दु । किपू नगरपालिका वडा नं ३ य् च्वंगु श्रीपंचमि मानन्धर गुथिया भवनय् न्ह्याःगु तालिम वंगु शनिवाः क्वचाःगु खः । नेपाल पर्यटन तथा होटल व्यवस्थापन प्रतिष्ठान (नाथम)या ग्वाहालिइ जूगु तालिमय् किपू नगरपालिका वडा नं. १, २ व ३ या पीम्हसेनं ब्वति काःगु खः ।
नाथमया प्रशिक्षकपिं सूर्य किरण श्रेष्ठ, नम्रता अधिकारी बद्री अर्याल, हिराज्ञान महर्जनं नसाज्वलं ज्वरे यायेगु, हाउस किपिंग, लेखा व रिसेप्सनया बारे प्रशिक्षण बियादीगु खःसा चिरायु नेशनल हस्पिटलया सहायक मेट्रोन गीता श्रेष्ठं प्राथमिक उपचार बारे प्रशिक्षण बियादीगु खः ।
तालिम समापन ज्याझ्वलय् झायादीम्ह मूपाहां किपू नगरपालिकाया प्रमुख रमेश महर्जन व विशेष पाहां नाथमया कार्यकारी निर्देशक दुर्गादत्त ढकालं प्रशिक्षार्थीपिंत दसिपौ लःल्हानादिल । ज्याझ्वलय् नवासें किपू नपया प्रमुख महर्जनं किपुलिइ नं होमस्टे न्ह्याके फइगु जूगुलिं थुकथंया तालिम अति आवश्यक जूगु व होमस्टे न्ह्याकेत नगरपालिकापाखें माःगु ग्वाहालि यायेत तयार दु धयादिल ।
नाथमया कार्यकारी निर्देशक ढकालं थौंकन्हय् नेपालय् वइपिं पर्यटकत फाइभ स्टार होटेलय् च्वनेगु स्वयां नं होमस्टेलय् च्वनेगु ययेकूपिं अप्वः दुगु धासें थ्व खँय् किपू थेंज्याःगु ऐतिहासिक व सांस्कृतिक नगरय् जूगुलिं होमस्टेलय् च्वनीपिं पर्यटक दुकायेत थज्याःगु तालिम उपलब्धि जुइ फइगु विश्वास प्वंकादिल ।
ग्वसाः खलःया नायः सुविन्द्रनारायण महर्जनया सभापतित्वय् जूगु ज्याझ्वलय् किपू नपा वडा नं. ३ या वडाअध्यक्ष राजेन्द्र महर्जनलिसें प्रशिक्षकपिंसं नं थःथःगु नुगःखँ तयादीगु खः ।भाइलाल महर्जनं लसकुस यानादीगु समापन ज्याझ्वलय् प्रशिक्षार्थीपिंसं मूपाहां, विशेष पाहां व प्रशिक्षकपिंत नेवाः परम्पराकथं सगं बिउगु खः ।
LEAVE YOUR COMMENTS