सोनिस अवालयात निःशुल्क अध्ययनया व्यवस्था

ख्वप – थनिं स्वदँ न्ह्यः गोरखाया बारपाक केन्द्र विन्दु जुयाः वःगु तःभुखाचय् लानाः नं सकुशल उद्धार याःम्ह सोनिस अवालयात निःशुल्क शिक्षाया व्यवस्था याःगु दु । २०७२ साल बैशाख १२ गतेया तःभुखाचं दकलय् अप्वः प्रभावित जूगु स्वनिगःया स्वंगू सहरमध्ये छगू ख्वपया मूध्वाखाय् च्वंम्ह सोनिसयात भुखाचं क्षतिग्रस्त जूगु भग्नावशेषपाखें २२ घन्टा लिपा सेनां सकुशल उद्धार याःगु खः ।

भुखाय् ब्वःगु इलय् सोनिस खुला जक दुगु खः । सेनां भुखाचय् लानाच्वंम्ह सोनिसयात २२ घन्टाया कुतः लिपा सकुशल उद्धार यायेवं छगूकथं विश्वय् चर्चित जूगु खः । सोनिसयात निःशुल्क अध्ययनया व्यवस्था नेपाली सेनां मिले याःगु खः ।

नेपाल सेनापाखें शैक्षिक वृत्ति अन्तर्गत न्यागू तगिं तकया शिक्षा अभिभावकं व्यवस्था याःगु विद्यालयय् ब्वंकेत ‘प्रधानसेनापति प्राकृतिक प्रकोप राहत कोष’ पाखें दँय्दसं न्यय्द्वः तका उपलब्ध याकीगु जूगु दु । वयां लिपा खुगू तगिंनिसें सेनां थःगु हे मातहतया सैनिक आवासी महाविद्यालय ख्वपय् निःशुल्क अध्ययनया व्यवस्था मिले याःगु खः ।