मिसा वहिष्कारवादी आन्दोलन

न्यने । आः । छगू आन्दोलन न्ह्यायेत्यंगु दु हँ ! बिस्कंकथंया आन्दोलन । आन्दोलनया छ्यं बारे जक छु न्यना जि ला अनसं होस मदुम्ह थें जुइ । ग्याइ । छाति हे भाराभारा मिनी । मतीमतीं धाये ‘छि छि छु छु जक न्यने माःगु ! न्यनेमाली तिनि । सु ज्या मदुपिनिगु ज्या थ्व ! का ! धाथें थ्व आन्दोलन च्याना वन धाःसा ….. ! सफल जुल धाःसा, छु छु जक जुइगु जुइ ….. ! विचाः याये … तर विचाः याःलिसे विचारं हे जितः ख्याइ ….. । जि ईई पनी ।

थरथर खाइ …..! मतीमतीं धाये ….. थःगु नुगःयात बसय् काये । धाये ! जूगु जुइ ….. पीर, चिन्ता कयां छु याये !? थःगु ल्हाती दुगु खँ मखु ।
मिसातय्त बहिष्कार यायेगु आन्दोलन हँ ! मिसातय्त विस्थापन यायेगु आन्दोलन हँ ! छु धाःगु जुइ ? थौंकन्हय् विश्वन्यंकं मिसा आन्दोलन न्ह्यानाच्वन । सलंसः दँ न्ह्यवंनिसें विश्वन्यंकं पितृ सत्ताया एकछत्रीय राज जुइ ।

पितृ सत्ताया शोषणय् मिसा जातित लाइ । इपिं दमनय् लाइ । थ्व हे पितृ सत्ताया दमन व शोषणया विरोध यासे मिसातय् आन्दोलन न्ह्याइ । पितृ सत्ताया विरोध याइ । मिसा मू शक्तिया निंतिं संघर्षरत जुइ । तर । मिसामुक्ति आन्दोलन धइगु मिजंतय्त बहिष्कार यायेगु आन्दोलन मखु । मिजंतय् दमन, शोषणया विरोधी आन्दोलन जक खः ।

मिजं बहिष्कार आन्दोलन थ्यंक हे मखु । खः । उग्र नारीवादीत स्वयम मिजं जाति हे मिसातय् निंतिं कं खः । पःखाः खः धकाः मिजंतय्पाखें पृथकतावादया वकालत याइ । तर बहुल मिसावर्गं थःगु अधिकार, स्वतन्त्रताया निंतिं बहस पैरवी याइ । तर इपिं मिजं विरोधी, बहिष्कारवादी हे थ्यंक धाःसा जुइमखु ।

अल्याख मनूतय् जीवनय् मिसाया प्रेमं गज्याः गज्याःगु प्रभाव लाकी । गुलिखे कवितय्सं मिसातय्त कयाः महाकाव्य, खण्डकाव्य, म्येँ, गीतिकाव्य च्वइ । विश्व साहित्यय् मिसा मतिना केन्द्रीत असंख्य वैभव दइ । आः वयाः थ्व गज्याःगु हू वःगु जुइ । थ्व मिसा बहिष्कारवादीतय् ! मिसा जातितय्त हे बहिष्कार !

आः छुकिया तं जुइ । गज्याःगु प्रतिशोधया दाग जुइ थ्व । मिसातय्त बहिष्कार यायेगु । इमित विस्थापन यानाः इमिगु थासय् बैकल्पिक मिसा प्रतिस्थापन यायेगु हँ ! छु धाःगु थ्व ? वैकल्पिक मिसा ! छु धाःगु ? गज्याःगु जुइ व वैकल्पिक मिसा धाःम्ह । जिं न्यने ।

तःधंगु अनुसन्धान, खोज यानाः छथ्वः मिजं वैज्ञानिकतय्सं वैकल्पिक मिसातय् आविष्कार याःगु दु हँ ! व आविष्कारं बहिष्कारवादी मिजंतय्त थःगु आन्दोलन न्ह्याकेत तःधंगु हःपाः बिउगु दु हँ ! मनोबल थकया बिउगु दु हँ ! अझ व हे वैकल्पिक मिसाया आविष्कारं ‘मिसा बहिष्कारवादीत छाति चकंकाः आन्दोलनय् कुहां वःगु दु हँ ! जि ला वाल्ल जिल्ल हे जुइ । खँत न्यनाः ।

गज्याःगु जुइ व वैकल्पिक मिसा प्राणी ! वया ग्वःगः मिखा दइ, ग्वःपा ल्हाः दइ । कल्पना यायां वने । अजीबम्ह प्राणीया बारे ….. तर जिं अनुमान याये फइमखु ।का स्व रे ! अनेक पुराण, मिथक, इतिहास, बाखनय् मिसाया निंतिं गुलि युद्ध जुइ । महाभारत जुइ । अल्याख मनूतय् जीवनय् मिसाया प्रेमं गज्याः गज्याःगु प्रभाव लाकी ।

गुलिखे कवितय्सं मिसातय्त कयाः महाकाव्य, खण्डकाव्य, म्येँ, गीतिकाव्य च्वइ । विश्व साहित्यय् मिसा मतिना केन्द्रीत असंख्य वैभव दइ । आः वयाः थ्व गज्याःगु हू वःगु जुइ । थ्व मिसा बहिष्कारवादीतय् ! मिसा जातितय्त हे बहिष्कार ! ध्याकुनय् चुइका छ्वयेगु ! छु थुकियात सांस्कृतिक क्रान्ति धाये फइला ? गथे यानाः धाये फइ ! सांस्कृतिक क्रान्तिं ला अनुशासन, मर्यादा, संयमया जक खँ हइ ! उच्छृंखलता व अश्लीलताया जकं विरोध याइ ।

मिसातय्त हे विरोध याइगु व सांस्कृतिक क्रान्ति धाये फइला ? व ला मानववाद विरोधी अभियान जुइ । मखुला ?मखु । थ्व मिसा बहिष्कारवादी आन्दोलन धाथें सफल जूसा मिसागुलुत ला वँय् हे जुइ । इमिसं गथे यानाः मन तइ । तया च्वनी जुइ । धाथें थ्व आन्दोलन विश्वव्यापी जुया बिल धाःसा ! श्रृष्टिचक्र हे दी फु ? मेगु वैकल्पिक श्रृष्टिया व्यवस्था गुकथं सम्भव जुइ ।

विचाः यायां हे संसार मरुभूमि जूगु भान जुइ । गनी ।हाकनं मती वइ । अथेला मिसा बहिष्कारवादी आन्दोलनया नं छुं छुं फाइदा दइ । मिसा हिंसा, बलात्कार, यौन उत्पीडन, यौन विकृतित थुकिं नियन्त्रणय् हइ । यौनजन्य अपराध जुइमखु । जुइके बी मखु । तर मेखर हाकनं पीर जुइ । विश्वय् मिजं मिसाया दथुइ जुइगु प्रेमक्रिडा, रसबसयात थ्व आन्दोलनं गन थ्यंकीगु जुइ ? बर्बाद हे याइ ।

अनमोल प्रेमगीत, प्रणयकाव्यत सुना वनी । गना वनी । जिगु नुगः थरथर खाइ !मिसा बहिष्कार आन्दोलन धाथें छु खः ! सीकेत स्वये । आन्दोलनया पर्चा छक्वः पूवंक ब्वने । वैकल्पिक मिसा धाःगु छु खः ? गज्याःम्ह प्राणी खः व ?! सीकेत स्वये । ब्वब्वं वने । विज्ञापन खने दइ । ‘वैकल्पिक मिसा । सहुलियत दइ । होम डेलिभरी जुइ । अनलाइन, अर्डर यानादीसां जिउ ।

स्वस्थकर व शान्त मिसा प्राणी जीवनपासा । सेक्स ट्वाय ।’ बहिष्कारवादीतय् पर्चा पूवंक ब्वने । अनायास धाये वइ ‘धत् !’