गठबन्धनया प्रधानमन्त्री सु ?

येँ (नेपालभाषा टाइम्स)- चुनावया अन्तिम लिच्वः पिहां वये न्ह्यः हे सत्ता गठबन्धन दुने सु प्रधानमन्त्री जुइ धइगु खँय् विवाद ब्वलंगु संकेत खने दया वःगु दु । खास यानाः आः गठबन्धनया सरकार दयेकीबलय् न्हापांगु चरणय् हे माओवादी केन्द्रया अध्यक्ष पुष्पकमल दाहालं प्रधानमन्त्री दावी याःगु कारणं थ्व कचवं पिहां वःगु खँ धाःगु दु ।
लिसें नेकपा (एकीकृत समाजवादी) या अध्यक्ष माधन नेपालं नं चीधंगु कार्यकालया लागिं जक जूसां थः नं प्रधानमन्त्री जुइ दयेमा धकाः दावी याना हयेवं गठबन्धन दुने न्हूगु संकट खने दयावःगु खँ सूत्रं धाःगु दु ।

नेपाली कांग्रेसं धाःसा थःपिं सत्ता गठबन्धनया तःधंगु पार्टी जूगु कारणं सरकार गठन थःगु हे नेतृत्वय् याये दयेमाः धकाः दावी याना वयाच्वंगु दु । वर्तमान प्रधानमन्त्री शेरबहादुर देउवाया नेतृत्वय् हे न्हूगु सरकार गठन जुइ धइगु दावी कांग्रेस नेतातय्सं यानाच्वंगु दु । अथे खःसां स्वयम् कांग्रेस दुने नं देउवाया थासय् आः थः प्रधानमन्त्री जुइ दयेमाः धकाः मेपिं प्यम्ह नेतात सक्रिय जुयाच्वंगु दु । कांग्रेस दुने थौंकन्हय् देउवा लिसें रामचन्द्र पौडेल, शशांक कोइराला, प्रकाशमान सिंह व गगन थापां प्रधानमन्त्रीया दावी यानाच्वंगु दु ।

मेखे माओवादी अध्यक्ष दाहालं थःपिनि दथुइ ‘पावर शेयर’ यायेगु सहमति जूगु खःसां न्हापांगु चरणय् थःपिंत हे सरकार गठन याकेमाः धकाः दावी यानाहःगु दु । न्हापा थःपिंसं देउवायात प्रधानमन्त्री त्वःतागु व चुनावी सरकारया नेतृत्व समेत देउवां याःगु जूगुलिं आः चुनाव लिपाया सरकारया नेतृत्व थःपिंसं याये दयेमाः धकाः माग यानाच्वंगु खँ सूत्रं धाःगु दु ।

नेकपा (एस) या अध्यक्ष माधव नेपालं धाःसा ‘पावर शेयरिंग’ सूत्र कथं निदँ कांग्रेसं चले यायेगु, निदँ माओवादीं चले यायेगु व अन्तिमया दछि थःत चले याके बीमाः धकाः दावी यानाच्वंगु दु । सूत्रया कथं नेता नेपालं थःपिंसं यक्व त्याग यानागु कारणं हे वर्तमान गठबन्धन तयार जूगु कारणं उकी थःपिनिगु नं शेयर दयेमाः धकाः दावी यानादीगु दु ।

माधव नेपालया पार्टीं प्रत्यक्षय् १० सिट त्याकूसां ३ प्रतिशतया थ्रेसहोल्ड कटे यायेत थाकुयाच्वंगु जूगुलिं संसदय् थ्व पार्टीयात स्वतन्त्रया मान्यता दयेफुगु खँ धाःगु दु ।
सूत्रतय्सं धाःकथं माओवादी अध्यक्ष दाहालया नेकपा (एमाले) पाखें प्रधानमन्त्रीया अफर छ्वया हःगु कारणं दाहालं थज्याःगु भाय् ल्हाना हःगु खः ।

यदि गठबन्धन तोडे यायेगु खःसा एमालें माओवादीयात हे उखेपाखें छुटे याकेमाःगु आवश्यकता दु । छुं ई न्ह्यः तिनि दाहालयात एमाले अध्यक्ष केपी ओलीं फोन यानादीगु खः ।

सम्बन्धित बुखँ

LEAVE YOUR COMMENTS