नेपालभाषा परिषद भवन व संग्रहालय लःल्हात
येँ (नेपालभाषा टाइम्स)- नेपाः सरकारया केन्द्रिय आयोजना कार्यान्वयन इकाइ (भवन तथा आवास)पाखें औपचारिकरुपं नेपालभाषा परिषदया भवन व संग्रहालयया ताःचाप्वाँय् परिषदयात लःल्हाःगु दु । वंगु बिहिवाः परिषद्य् जूगु छगू ज्याझ्वःया दथुइ परिषदया छ्याञ्जे पुष्परत्न तुलाधरयात इकाइया आयोजना निर्देशक कोषराज अधिकारीं ताःचाप्वाँय् लःल्हानादीगु खः ।
ज्याझ्वलय् न्ववानादिसें आयोजना निर्देशक अधिकारीं भवनया ईल्वहं तयेगुनिसें क्वमचाःतले थः संलग्न जुयागु खँ कंसे भवन परम्परागतकथं सिँ व प्रविधि छ्यलाः भुकम्प प्रतिरोध जुइकथं दयेकागु खँ न्ह्यथनायिदल । भवन निर्माणया लागी भारत सरकारपाखें ५ करोड ४५ लाख ३६ हजार दां ग्वाहालि बिइगु क्वःजिउगु खःसां ४ करोड ७९ लाख ४३ हजार तका दामं भवन तयार याःगु खः ।
आयोजनाया उपनिर्देशक गंगाप्रसाद यादवं थःगु अनुभव कनादिसें फछिंफतले न्हापायागु संरचनायात मस्यंकुसे यक्व हे परिमार्जन यानाः संग्रहालयय् चित्तधरया जीवन्त घटना ब्वयागु खँ कुलादिल । अथेहे निर्माण व्यवसायी धर्मरत्न महर्जनं थ्व भवन थःगु हे छेँथें भाःपिया दयेकागु खँ कनादिल ।
ज्याझ्वःया दथुइ भवन निर्माण सम्वन्धि भिडियो नं क्यनेज्या जूगु खः । ज्याझ्वःया सभापति थासं न्ववानादिसें छ्याञ्जे तुलाधरं भवनया परम्परागत शैलीयात गथे खः अथे हे कायम याना दयेकूगु खँय् सन्तोष प्वंकादिसें नेपाल सरकार, भारत सरकार, केन्द्रिय आयोजना कार्यान्वयन इकाइ (भवन तथा आवास), पुरातत्व विभाग, परामर्शदाता इन्टाक, निर्माण व्यवसायी धर्मरत्न महर्जन व संलग्न परिषदया फुक्क दुजःपित धन्यवाद ज्ञापन यानादिल ।
परिषदया दुजः बिमलप्रभा बज्राचार्यं लसकुस यानादीगु ज्याझ्वः आजीवन जः दिब्या ताम्राकारं न्ह्याकादीगु खः ।
LEAVE YOUR COMMENTS