कर्मचारी व पत्रकार दथुइ अन्तरक्रिया

ख्वप – सूर्यविनायक नगरपालिकाया जनप्रतिनिधितय्सं पदभार ग्रहण याःगु दछि क्यंगु लसताय् पत्रकार व कर्मचारी दथुइ छगू अन्तरक्रिया ज्याझ्वः जुल । ज्याझ्वलय् मूपाहांकथं झायादीम्ह सांसद महेश बस्नेतं ज्याझ्वःया उलेज्या यासें देय्या गौरव जुयाच्वंगु जिल्लाया विकास निर्माण तीव्र धंगं जुयाच्वंगु इलय् केन्द्र, प्रेश व स्थानीय तहय् नं व हे गतिं विकास निर्माणया ज्याः न्ह्याः वनेमाःगु खँय् बः बियादिल ।

विशेष पाहां प्रदेशसभा सदस्य शशिजंग थापां मुक्कं नगरय् आधारभूत तहय् अंग्रेजी भासं शिक्षा बीगु नापं ५३ करोड जक बजेट दुगु खःसां आन्तरिक राजस्व व योजनावद्ध विकासया ज्याझ्वःया कारणं ख्वप नगर न्ह्यःने लानाच्वंगु खः धयादिल । लिसें वय्कलं विपक्षीया सशक्त उपस्थितिया दथुइ नं थुगु नगर न्ह्यःने लाःगु धइगु भाग्यमानी खः धयादिल ।

जिल्ला समन्वय समितिया प्रमुख नवराज गेलालं कार्यशैली व ज्याया ल्याखं न्ह्यःने लानाच्वंगु नगरपालिकां आः नगर प्रहरीया व्यवस्था नापं सीसी क्यामरा तयाः बांलाःगु ज्या याःगु दु धयादिल । नेपाल पत्रकार महासंघ ख्वप जिल्लाया अध्यक्ष पुष्करराज बुढाथोकीं पत्रकारलिसे निरन्तर रुपं साक्षात्कार जुयाच्वनेमाः खँय् बः बियादिल । ज्याझ्वलय् पत्रकारत कृष्ण प्रजापति, रमेश गिरी, पेशल आचार्य, जयराम बास्तोला लगायतं थीथी न्ह्यसः तयादीगु खः ।