डा. शिवमायाया धापू

प्रतिनिधिसभाया गरिमा ल्यंकेगु निंतिं थम्हं राजीनामा बियागु खँ उपसभामुख तुम्बाहाम्फें धयादीगु दु । संसदया बैठकय् उपसभामुख पदं राजीनामा बीधुंकाः पत्रकार सम्मेलन यासें वय्कलं धयादी, ‘जिं थौं लडाईं शब्द छ्यलाच्वना, जितः थ्व शब्द छ्यलेत तसकं यल, जिं प्रतिनिधिसभाया गरिमा व प्रतिष्ठा ल्यंकेगु लडाईं त्याकेधुन ।’

वय्कलं थम्हं पार्टीया नेतातय्सं बिउगु दबाब कथं राजीनामा बियागु खःसा थ्व जनताया भावना अःखः जुइ धासें थम्हं आम नेपाःमिया भावनायात प्रतिनिधित्व यानागु दावी नं यानादिल । वय्कलं न्ह्यःने धयादी, ‘प्रतिनिधिसभा व दल थःगु क्षेत्र कथं न्ह्यायेमाः, प्रतिनिधिसभाया इज्जत ल्यंकेगु निंतिं दलया निर्देशन माने याये मखु धयागु खः । जिगु आज्जु पूवंगु दु, थ्वयां लिपा गुगुं नं दलं सभामुख वा उपसभामुखयात थुकथं निर्देशन बीगु ज्या मयाइगु जुइ ।’