ने. सं. ११४४ कौलाथ्व एकादशी - चालं

न्हूगु आकाशे ताँय् विज्ञापन याये मदइगु

येँ – येँ महानगरपालिकां थःगु क्षेत्राधिकार दुनेया अतिकं व्यस्त लागाय् दयेकेत्यंगु आकाशे ताँय् छुं नं कथंया विज्ञापन याये मदइगु जूगु दु । थ्व स्वयां न्ह्यः अज्याःगु आकाशे ताँय् थीथी व्यावसायिक कम्पनीया विज्ञापन, होर्डिङ बोर्ड आदिया तयाः येँ मनपां आम्दानी याना वयाच्वंगु खः । येँ मनपां चालु आर्थिक दँय् लँजुवातय् अत्याधिक चाप दइगु थीथी च्यागू थासय् आकाशे ताँ निर्माण यायेगु योजना हःगु खः ।

येँ मनपां आकाशे ताँ दयेकेगु निंतिं चालु आर्थिक दँय् छगू करोडया बजेट नं विनियोजन याःगु खः । वंगु छुं ई न्ह्यवनिसें येँ मनपां लाक्वपाक्व थासय् छुं नं कथंया विज्ञापन याये मदइगु नीति हःगु खः । लाक्वपाक्व थासय् पर्चा, पम्पलेट, पोष्टर तिकेगु नापं विज्ञापन यायेगुलिइ रोक लगे याःगु खः ।

येँ मनपां वंगु आर्थिक दँय् जक विज्ञापन कर वापत १० गू करोड ९४ गू लाख ८६,०७९ तका दां असुल याःगु खः । आः न्हू दयेकीगु तां याउँक व अःपुक छगू थासं मेगु थासय् वने फइकथंया जुइगु व थुकथंया ताँ नेपालय् न्हापांखुसी दयेकेत्यनागु येँ मनपां न्ह्यथंगु दु । थ्व स्वयां न्ह्यः परीक्षणया रुपय् थनया पुलांगु बसपार्क न्ह्यःने स्थानान्तरण याये फइकथंया ताँ दयेकूगु खः ।

ताँया डिजाइन तयार जुइधुंकूगु व डिजाइन कथंया ताँ निर्माण दयेकेत बोलपत्र आह्वान यायेगु तयारी जुयाच्वंगु येँ मनपा भौतिक पूर्वाधार महाशाखा प्रमुख इन्जिनियर रामबहादुर थापां कनादिल । वय्कलं थ्व हे साउन दुने बोलपत्र आह्वान यानाः निर्माण शुरु यायेगु तयारी जुयाच्वंगु नं धयादीगु दु ।

थौंकन्हय् येँ महानगर लागा दुने न्हूसतक, लुँहिति, वीर अस्पताल, जमः, रत्नपार्क, बागबजाः, पुलांगु बसपार्क, न्हूगु बसपार्क, रत्नपार्क–भोताहितिइ आकाशे ताँ संचालनय् वयाच्वंगु दुसा आः लँजुवातय् अप्वः चाप दइगु थाय् टेकु भंसार, माइतीघर, बबरमहल, कोटेश्वर, गौशाला, महाराजगंज, पुतलीसतक, त्रिपुरेश्वर यानाः च्यागू थासय् आकाशे ताँ दयेकेत्यंगु खः ।