देय् आचाःगू क्वचाल

येँ – येँदेय्या झिंच्यागू महाविहारया वज्राचार्यपिनिगु निन्हुयंकंया देय् आचाःगू क्वचाःगु दु । न्हापांगु न्हि स्वयम्भूइ व लिपांगु न्हि हनुमानध्वाखाय् मामकि व वज्रसत्व पुजा यासें निन्हुयंकंया देय् आचाःगू क्वचाःगु खः । देय् आचाःगूया न्हापांगु न्हिं स्वयम्भू महाचैत्यया शान्तिपुलिइ वज्राचार्य गुरुजुपिंत जाकि, बति, कय्गू, ध्यबा लगायत थीथी हलंज्वलं दान याःगु खः ।

स्वयम्भू महाचैत्य न्ह्यः कलश व मामकि पुजा याःगु खःसा भुइख्यलय् गणचक्र पुजा जूगु खः । स्वयम्भूइ जूगु पुजा ज्याझ्वःया पाःलाः प्रेमरत्न वज्राचार्य(मैत्रीपुर महाविहार) व भाइरत्न वज्राचार्य (मन्त्रसिद्धि महाविहार) खः । अथे हे हनुमानध्वाखाय् पालाः श्याममान वज्राचार्य (सिख्वःमूबहाः) व शीलमान वज्राचार्य (वज्रशील महाविहार)या नेतृत्वय् जूगु ज्याझ्वलय् वज्राचार्य (गुरुजु)पिंत जाकि, बजि, ध्यबा लगायत दानप्रदान यायेगु ज्या जूगु खः ।

येँ देय्या १८ गू महाविहारया स्वद्वलं मल्याक वज्राचार्यपिनिगु सहभागिता दुगु आचाःगुथिया झ्वलय् निन्हुया न्हिकुन्हु जूगु वज्रसत्व पुजाया झ्वलय् आनन्दमुनि वज्राचार्यं वज्रसत्वया प्याखं व राजगुरुजु मञ्जुश्रीरत्न वज्राचार्यं विशेष पुजा यानादीगु खः ।

ज्याझ्वलय् येँ महानगरपालिकाया प्रमुख विद्यासुन्दर शाक्यं देय् थाय्पा धुपरत्न वज्राचार्या ल्हातं सिन्हः तिनाः प्रसाद ग्रहण यानादीगु खः ।बौद्ध धर्मया अनुयायी वज्राचार्यतय् मौलिह पहिचानया रुपय् दुगु देय् आचाःगू दँय्दसं चिल्लागा अस्तमि व नवमि निन्हुयंकं बौद्ध परम्पराकथं न्यायेकेगु याना वयाच्वंगु दु ।

 

सम्बन्धित बुखँ

LEAVE YOUR COMMENTS