राजपाया संशोधित धलः थौं वइगु

येँ (नेपालभाषा टाइम्स) – राष्ट्रिय जनता पार्टीं (राजपा) अन्ततः निर्वाचन आयोगं छ्वया हःगु निर्देशन कथं हे प्रदेशपाखें त्याना वनीपिं समानुपातिक सांसदतय् नां बुझे याइगु जूगु दु । निर्वाचन आयोगं राजपायात थौं तकया दुने समानुपातिक धलः संशोधन यानाः बुझे यायेत निर्देशन बियातःगु खः । तर राजपां उकियात वेवास्ता यायेवं आयोगं राजपाया धलः स्थगित यानाः सूची सार्वजनिक यायेगु ख्याच्वः बिउगु खः । आयोगया ख्याच्वः लिपा राजपां थौं ४ बजे तकया दुने संशोधित धलः बुझे यायेगु खँ उगु पार्टीया महासचिव किशोर सुमनं कनादीगु दु ।
२ नम्बर प्रदेशय् राजपां १० सिट प्राप्त याःगु दु । तर राजपां त्याना वनीपिं सांसदतय् नां बिउबलय् खुम्ह तकया ल्याः न्हापा बुझे याना तःगु बन्द सूची कथं मिले जुइक छ्वःगु खःसां वयां लिपा वःपिं प्यम्हेसिया नां धाःसा बन्द सूची हाचांगायाः तया हःगुलिं आयोगं उकियात अस्वीकार याःगु खः ।