चक्रपथया सर्भिस ट्र्याक बछि सिधल

येँ – कोटेश्वर–कलंकी सतकखण्ड अन्तर्गतया दकलय् पिनेया लेन (सर्भिस ट्र्याक) निर्माण यायेगु ज्या बछि सिधःगु काठमाडौं चक्रपथ सुधार योजनां न्ह्यथंगु दु । झण्डै १० दशमलव ४ किलोमिटरया उगुसतक खण्डया बाहिरी लेन (सर्भिस ट्र्याक)या ज्या ५० प्रतिशत क्वचायेधुंकूगु योजनां जानकारी बिउगु खः ।

चिनिया सरकारया ग्वाहालिइ निर्माण जूगु कोटेश्वर–कलंकी सतकखण्ड वंगु छुं दिं न्ह्यः जक चिनिया दूवातासं नेपाल सरकारयात लःल्हाःगु खः । योजनाया इन्जिनियर निरञ्जन शर्मा अर्यालया कथं सतकखण्डया च्यागू लेन चिनिया निर्माण कम्पनीं व निगू लेन नेपाल सरकारं निर्माण यायेगु सम्झौता जूगु खः ।

नेपाल सरकारं फ्याःगु वार्षिक बजेटं जक ज्या यायेमाःगुलिं नेपाःपाखें निर्माण जुयाच्वंगु भागया बछि ज्या सिधःगु व छुं भागया ज्या जुयाच्वंगु योजनां न्ह्यथंगु दु । फक्व याकनं ज्या सिधयेकेगु ल्यां ज्या यानाच्वनागु इन्जिनियर अर्यालं कनादिल । थगुने च्यागू लेनया ज्या न्ह्यानाच्वंगु व निगू लेनया सतक जःखः च्वंगु संरचना चिइकेत लिबाःगुलिं ज्याय् नं ढिलासुस्ती खने दयाच्वंगु योजनां न्ह्यथंगु दु ।