ख्वपय् मचा अपहरण यानाः स्याःपिं निम्हेसिया इन्काउन्टर

ख्वप – छम्ह मचायात अपहरण यानाः स्याःपिं निम्हेसित प्रहरीं इन्काउन्टरय् स्याःगु दु । उमिसं येँया काँडाघारीं निशान खड्का नांया छम्ह मचायात अपहरण याना यंकूगु खः । अपहरण याना यंकूम्ह मचाया सीम्ह थिमिया छखा दनाच्वंगु छेँय् लूगु खः ।
मचायात स्यानाः बिसिउँ वंपिं अपहरणकारीत सूर्यविनायकया जंगलय् सुलाच्वंगु खबर वयेवं प्रहरीया न्यागू पुचलं जंगलय् मालेज्या सुरु याःगु खः । सूर्यविनायकं च्वय् पाइलटबाबा वनेगु जंगलय् छथ्वः प्रहरीया पुचःलिसे जूगु भिडन्तय् अपहरणकारीत प्रहरीया गोली लानाः सीगु खः । महानगरिय प्रहरी अपराध महाशाखाया वरिष्ठ प्रहरी उपरीक्षक धीरजप्रताप सिंहं प्रहरी लिसे जूगु भिडन्तय् नुवाकोट सामरी धाःथाय् च्वंम्ह २४ दँया अजय तामाङ व सिन्धुपाल्चोक कार्यथलीइ च्वंम्ह २३ दँया गोपाल तामाङ सीगु खः ।
मचाया सीम्ह सोमवाः न्हिनय् लुइवं प्रहरी अपहरणकारीत मालेज्या तच्वयेकूगु खः । मचाया सीम्ह थिमि नगरपालिका ७ वडा नगदेश बुद्धविहारया क्वय् पाखे दयेकाच्वंगु छखा छेँय् मंगाः दयेकेत गाःम्हुया तःथाय् थुनातःगु लुइकूगु खः । सीम्ह मचायात म्हुतुइ रुमाल कोचे यानातःगु व निपां तुतिइ टेपं हिनातःगु अवस्थाय् लुइकूगु खः ।
वरिष्ठ प्रहरी उपरिक्षक सिंहया कथं सूर्यविनायकया गणेद्यःयाथासं पाइलटबाटा वनेगु जंगलय् अपहरणकारी नापलायेगु उमिसं गोलीं कयेकेगु सुरु याःगु खः । प्रहरीं जवाफी कारवाही याःबलय् निम्हं सीगु खः । घटनास्थलं प्रहरीं छपु पेस्तोल, निगू राउन्ड गोली व मोबाइल बरामद याःगु दु ।
अपहरणकारीतय्सं आइतवाः सनिलय् झिंछदँ दुम्ह मचा निशान खड्या अपहरण याःगु खः । काँडाघारीया टाउन मचाया मां चमेली खड्कां चायेकातःगु नःपसलय् न्ह्याबलें नःवइपिं उमिसं आइतवाः सनिलया ६ बजे पाखे मचाया अपहरण याःगु खः । सनिलय् पसलय् च्वनाः उपिं नाप खँ ल्हानाच्वंम्ह मचायात अपहरणकारीतय्सं चाःहिउवनेगु धकाः ब्वना यंकूगु खः । मचा बहनी ८ बजे तक नं लिहां मवयेवं प्रहरीयात खबर याःगु खः । उकुन्हु हे बहनी अपहरणकारीतय्सं मांम्हेसित ४० लाख ध्यबा बिउसा जक मचा लित बिइगु धकाः फोन यानाहःगु खः । मचा अबु खाडी देशय् ज्या याः वनाच्वंम्ह खः धाःगु दु ।

सम्बन्धित बुखँ

LEAVE YOUR COMMENTS